Astanada 15 kitap oqyp, 600 myń teńge utyp alýǵa bolady
ASTANA. KAZINFORM – Astana «Kitap oqıtyn ult» respýblıkalyq jobasyna qosyldy. Elorda turǵyndary alty aıda 15 kitap oqyp, arnaıy synaqtardan ótý arqyly 600 myń teńgege deıin aqshalaı syılyq utyp ala alady, dep habarlaıdy elorda ákimdigi.
«Kitap oqıtyn ult» marafony qyrkúıek aıynda bastalady. Buǵan deıin Astana ákimdigi men «Kitap oqıtyn ult – Chıtaıýşaıa natsııa» qoǵamdyq qory tıisti memorandýmǵa qol qoıǵan.
Joba oqý mádenıetin damytýǵa baǵyttalǵan.
Marafon sharty boıynsha qatysýshylar alty aı ishinde 15 kitap oqýy kerek. Odan keıin olar oqyǵan shyǵarmalary boıynsha testileýden jáne birneshe zııatkerlik kýızden ótedi.
Synaqtardyń qorytyndysy boıynsha ár sanattaǵy úzdik komandalar anyqtalady.
– Birinshi orynǵa – 600 myń teńge, ekinshi orynǵa – 450 myń teńge, úshinshi orynǵa 300 myń teńge aqshalaı syılyq qarastyrylǵan, – delingen habarlamada.
Marafonǵa 6-10 synyp oqýshylary, kolledjder men joǵary oqý oryndarynyń stýdentteri, pedagogter, memlekettik qyzmetshiler, ata-analar, sondaı-aq mamandyǵy men qyzmet túrine qaramastan barlyq nıet bildirýshi qatysa alady.
Joba qazaq jáne orys tilderinde ótedi.
Qatysýshylardy tirkeý bıyl qyrkúıek aıynda jobanyń resmı saıtynda bastalady.
Joba aıasynda kúzde elordada ádebı kezdesýler, jalpyhalyqtyq kitap oqýlar, kitap jobalary, aǵartýshylyq aktsııalar jáne basqa da is-sharalar ótkizý josparlanǵan. Uıymdastyrýshylar bul sharalar kitap oqýǵa qyzyǵýshylyqty arttyrýǵa, otandyq ádebıetti qoldaýǵa jáne úzdiksiz bilim alý mádenıetin qalyptastyrýǵa baǵyttalǵanyn atap ótti.
Aıta keteıik, «Kitap oqıtyn ult» marafonyna 1 mıllıonnan astam adam qatysady.
