Astanada 142 komanda baq synaıtyn álemdegi eń mártebeli baǵdarlamashylar saıysy bastaldy
ASTANA. KAZINFORM – QR Prezıdenti ortalyǵynda álemdegi eń mártebeli stýdenttik sporttyq baǵdarlamalaý saıysy – ICPC World Finals 2024 fınalynyń ashylý saltanaty ótti. Bul aýqymdy is-sharaǵa jyl saıyn álemniń túkpir-túkpirindegi úzdik baǵdarlamashylar komandalary qatysady. Bul týraly TsDIAÓM baspasóz qyzmeti málimdedi.
2023 jyly Mysyrdyń Lýksor qalasynda ótken ICPC World Finals jarysynda Qazaqstannyń alty komandasy baq synaǵan. Al qazaqstandyq Batyr Sardarbekov altyn júldege ıe bolyp, elimizden shyqqan tuńǵysh ICPC chempıony atandy.
Bıyl 111 el men 3000 ýnıversıtettiń namysyn 59 000 qatysýshy qorǵap, aımaqtyq jáne ulttyq irikteýden súrinbeı ótken 142 komanda fınalǵa shyqty. Qazaqstan atynan fınalda eldiń eń úzdik tehnıkalyq JOO-nyń bes komandasy qatysady. Bul oqıǵa Qazaqstannyń Ortalyq Azııadaǵy negizgi IT-hab retindegi mártebesin nyǵaıtý jolyndaǵy mańyzdy qadam bolmaq.
«Qazaqstan úshin bul óte mańyzdy sát, óıtkeni biz elimizdiń jetekshi tehnıkalyq joǵary oqý oryndarynyń bes komandasymen tanystyrdyq. Bul bizdiń stýdentterimizdiń joǵary daıyndyq deńgeıin kórsetedi jáne Qazaqstannyń Ortalyq Azııadaǵy negizgi IT-hab retindegi mártebesin rastaıdy. Mundaı is-sharalar halyqaralyq yntymaqtastyqty nyǵaıtyp qana qoımaı, baǵdarlamashylardyń jańa býynyn shabyttandyra otyryp, elimizde IT-salanyń damýyn yntalandyratynyna senimdimin. Bizdiń komandalar laıyqty nátıjeler kórsetip, Qazaqstannyń IT-ındýstrııasyn álemdik deńgeıde damytýdy jalǵastyrady dep senemiz», - dep atap ótti Tsıfrlyq damý mınıstrliginiń basshysy Jaslan Mádıev.
Jarys Astanada 15-20 qyrkúıek aralyǵynda ótedi. Chempıonat aıasynda qatysýshylardy Huawei uıymdastyratyn ICPC Challenge, JetBrains pen sporttyq baǵdarlamalaýdan eks álem chempıondary ótkizetin blind-coding boıynsha biregeı sheberlik saǵaty, sondaı-aq ózge de is-sharalar kútip tur.
2024 ICPC World Finals chempıondary 19 qyrkúıek kúni fınalısterdiń kod arqyly algorıtmdik esepterdi sheshýge berilgen bes saǵattyq jarysty aıaqtaǵannan keıin, shekteýli ýaqyt jaǵdaıynda qateler men durys emes múmkindikter nátıjesinde anyqtalady.
