Astanada 14 jasar qyz balany qaǵyp ketip, oqıǵa ornynan jasyrynǵan júrgizýshi izdestirilýde
ASTANA. Qazannyń 25-i. QazAqparat /Gúlmıra Álıakparova/ - Astana qalasynyń Jol polıtsııasy 14 jasar qyz balany qaǵyp ketip, oqıǵa ornynan jasyrynǵan júrgizýshini izdestirý ústinde.
Jol polıtsııasy basqarmasynan málim etkendeı, qazannyń 16-sy kúni tańerteńgi saǵat 8 shamasynda Beıbitshilik pen Moldaǵulova kósheleriniń qıylysynda kúńgirt tústi shet el kóligine mingen júrgizýshi baǵdarsham jasyl janǵan kezde joldan ótip bara jatqan qyzdy qaǵyp ketip, oqıǵa ornynan izin sýytqan.
«Apat saldarynan 14 jasar qyzdyń mıy shaıqalǵan, oń jaq jambasynyń jumsaq tinderi jaraqattanǵan jáne bas súıeginiń jabyq jaraqaty bar. Osy oraıda, jol-kólik oqıǵasynyń mán-jaıyn anyqtaý maqsatynda kýágerler men oǵan qatysty qandaı da bir aqparattary bar tulǵalardy JPB-ǵa habarlasýdy suraımyz», delingen taratylǵan habarlamada.
Astana qalasy JPB-nyń telefondary 53-22-53,53-27-76, 53-22-63.
