Astanada 14 myńnan astam saıajaı úıi súriledi
ASTANA. QazAqparat - Astana qalasynda 14 myńnan astam saıajaı úıi súriledi, dep habarlaıdy QazAqparat Elorda.info saıtyna silteme jasap.
Búginde Astanada 108 saıajaı qaýymdastyǵy bar. Olarda 14 166 saıajaı ýchaskeleri ornalasqan. 1998 jyly Astananyń aýmaǵynda 38 544 saıajaı bolǵan. Sońǵy jıyrma jyldyń ishinde olardyń 24 378-i súrilgen.
«Qalanyń ishindegi barlyq saıajaılar súriledi. Qabanbaı batyr dańǵylynyń sol jaǵyndaǵy saıajaı alaby kelesi jyly túgeldeı alynady. Sondaı-aq Nazarbaev Ýnıversıtetine jetpeı, oń jaqta saıajaı alaby bar. Investorlar jerdi satyp alyp, kúreý máselesimen aınalysyp jatyr. Ári qaraı sport nysandarynyń aýdanyndaǵy saıajaılardy súrý kózdelgen. «Han shatyr» saýda, oıyn-saýyq ortalyǵynyń artyndaǵy saıajaılar da bosatylady. Qalanyń ishindegi barlyq saıajaı telimderi ınvestorlardyń esebinen súriledi», - dedi «Astana bas jospary» ǴZJI» JShS bas sáýletshisi Arsenıı Pırojkov.
Onyń aıtýynsha, súrý jumystary naqty qaı ýaqytta júrgiziletini ázirge belgisiz.
«Qarjylandyrýǵa baılanysty, ınvestorlarda aqsha bolǵan kezde, buzý jumystary bastalady. Biz naryqtyq qatynastan attap kete almaımyz», - dedi ol.
Súrilgen eski nysandardyń ornynda júrgiziletin qurylystyń josparyn myna saıttan kórýge bolady. Atalmysh saıtta tek súriletin saıajaılar ǵana emes, basqa da tozyǵy jetken nysandar men olardyń ornyna salynatyn mektep, balabaqsha, turǵyn úı jáne taǵy basqalary týraly málimet bar.
Avtor kollaja: Dıas Majenov
