Astanada 14 myń gektardy quraıtyn 645 jer ýchaskesi paıdalanylmaı jatyr

Bul týraly búgin Óńirlik damý mınıstrliginde Memleket basshysynyń tapsyrmalaryn oryndaý máselelerine arnalǵan keńeste málim boldy.

Mınıstrliktegi Jer resýrstaryn basqarý komıtetiniń tóraǵasy Baýyrjan Smaǵulovtyń aıtýynsha, Elbasy tapsyrmasyna oraı, Astana qalasy boıynsha jerdi túgendeý jumystary júrgizilgen. «Jerdi túgendeý nátıjelerine sáıkes, Astana qalasy aýmaǵynda aýyl sharýashylyǵy men kommertsııalyq nysandar salýǵa arnalǵan 14 myń gektardy quraıtyn 645 jer ýchaskesi paıdalanylmaı jatqany anyqtaldy. Onyń ishinde jalpy aýmaǵy 2 myń gektardy quraıtyn 142 jer ýchaskesi bıyl anyqtalyp otyr», - deıdi B.Smaǵulov.

Onyń aıtýynsha, tekserýler nátıjesinde japy aýmaǵy 1,6 myń gektardy quraıtyn 52 jer ýchaskesi sot tártibimen memlekettik menshikke ótken. Al sottardyń qaraýynda áli 2,9 myń gektardy quraıtyn 58 jer ýchaskesiniń máselesi jatyr.

«5,7 myń gektardy quraıtyn 362 jer ýchaskesiniń ıelerine jazbasha eskertý hattary joldandy. Jer kodeksiniń 94 babyna sáıkes, osyndaı jer ýchaskeleri berilgennen soń olar paıdalanylýy qajet, al ondaı jerlerdiń ıgerilmeýi jaǵdaıynda jer sot tártibimen májbúrli túrde memleket menshigine qaıtarylady. Al eskertýden soń jalpy aýmaǵy 2 myń gektardy quraıtyn 31 jer ýchaskesin ıeleri ıgere bastady», - deıdi B. Smaǵulov.