Astanada 14 balanyń qyzylshamen aýyrǵany rastaldy
ASTANA. QazAqparat - Astanada 14 balanyń qyzylshamen aýyrǵany rastaldy. Dıagnozy rastalǵan barlyq naýqasqa ekpe egilmegen, dep habarlaıdy QazAqparat Elorda Infoǵa silteme jasap.
Astanadaǵy Juqpaly balalar aýrýhanasyna táýligine 200-ge deıin balalar kelip qaralýda.
«Ótken aptada jedel respıratorly vırýstyq ınfektsııamen aýyrǵandar kóbeıdi. Barlyq naýqastar bórtpe jáne qyzylsha juqpaly aýrýlaryna qarsy tekserildi. Ol aýrýlardyń belgileri baıqalǵan jaǵdaıda birden aýrýhanaǵa jatqyzyldy. Búgingi tańda aýrýhanada qyzylsha dıagnozy bar degen 41 naýqas bolsa, onyń ishinde 14 naýqastyń dıagnozy zerthanalyq rastaldy», - dedi qalalyq balalar juqpaly aýrýlar aýrýhanasy bas dárigeriniń medıtsınalyq bólim jónindegi orynbasary Olga Pýshkareva.
Qabyldaý bólimindegi dáriger naýqastyń dene qyzýy, tynys alýy, júreginiń soǵýy sekildi ómirine qaýip tóndiretin parametrler boıynsha 3 jolaqtyń qaısysyna jatatynyn anyqtaıdy. Qyzyl jolaqtaǵy balalardyń jaǵdaıy aýyr, tez arada dárigerdiń kómegine júginý qajet degendi bildiredi. Olar dereý dárigerdiń qabyldaýyna barady. Sary jolaqtaǵylardy kezegi kelgende dáriger qabyldaıdy. Al jasyl jolaqqa túskenderdiń ómirine eshqandaı qaýip joq, dárigerdiń keńesin alyp, kóp jaǵdaıda úıine jiberiledi.
«Birinshiden, aýrýhanadaǵy naýqastarǵa ekpe egilmegen. Bir jasqa deıingi balalarǵa qatysty josparly ekpe jylyna jáne 6 jasqa deıingi revaktsınatsııa júrgiziledi. Sondyqtan bir jasqa deıingi balalar óz ekpelerin alǵan joq. Al birden asqan balalar ár túrli sebeptermen bas tartqan», - dedi ol.
Eske sala ketsek, QR Densaýlyq saqtaý mınıstrliginiń málimetinshe, Qazaqstanda 2018 jyly qyzylshaǵa qatysty 26 rastalǵan oqıǵa tirkelgen, onyń ishinde 20 jaǵdaıda 14 jasqa deıingi balalar aýyrǵan.
