Astanada 1300-den astam azamat polıtsııaǵa qoǵamdyq kómek kórsetedi

ASTANA. QazAqparat – Astana polıtsııasynyń qoǵamdyq kómekshilerine kýálikter men jetondar tabys etildi, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.

Polıtsııanyń qoǵamdyq kómekshilerine kýálikter men jetondardy Astana qalasy Polıtsııa departamenti bastyǵynyń birinshi orynbasary, polıtsııa polkovnıgi Dáýren Qazbekov tabystady.

«Quqyq buzýshylyqtar men qylmystardyń aldyn alýda ýchaskelik ınspektorlarmen birlesip, qaýipsizdikti qamtamasyz etýge atsalysatyn polıtsııanyń qoǵamdyq kómekshileri pármendi kómek kórsetedi», - dep atap ótti ol.

Búgingi tańda qoǵamdyq tártipti qorǵaýǵa 1 344 ókil qatysady, onyń ishinde quqyq qorǵaý organdarynyń ardagerleri, konserjder, kúzet qurylymdarynyń qyzmetkerleri, jedel-jastar jasaqtarynyń músheleri bar.

Ótken jyly qoǵamdyq qurylymdar 3 057 ákimshilik quqyq buzýshylyqty anyqtaýǵa úles qosty. ІІO-ǵa 1 798 quqyq buzýshy jetkizildi, 398 jedel aqparat berildi.