Astanada 13 qyrkúıek kúni halyqaralyq dárejede aqyndar aıtysy ótedi

ASTANA. QazAqparat - Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasyna oraı, elordadaǵy «Qazaqstan» ortalyq kontsert zalynda 13 qyrkúıek kúni saǵat 15:00-de «Rýh jańǵyryǵy» atty halyqaralyq aqyndar aıtysy ótedi. Jyr dodasyna elimizge tanymal ári shetelden kelgen 16 aqyn qatysady, dep habarlaıdy «QazAqparat» HAA tilshisi.

Halyqaralyq dárejedegi aıtysty QR Prezıdenti Ákimshiligi, QR Mádenıet jáne sport mınıstrligi, «Nur Otan» partııasy Astana qalalyq fılıalynyń qoldaý kórsetýimen halyqaralyq «Jas-Aı» medıtsınalyq ortalyǵy uıymdastyrady.

QR Mádenıet jáne sport mınıstrliginiń baspasóz hatshysy Nurbol Almanovtyń habarlaýynsha, aqyndar aıtysy eki kezeń boıynsha ótedi. Alǵashqy irikteý kezeńinde quramy 7 músheden turatyn qazylar alqasy aqyndardyń aıtystaǵy sóz saptaýyna, oıynyń ushqyrlyǵyna, utymdy sóz taba alatynyna qaraı otyryp, 8 aıtyskerdi anyqtaıdy. Ekinshi kezeńde osy 8 aqyn bas júldeni sarapqa salady.

Sóz dodasyna Astana men Almaty qalasynan, Almaty, Jambyl, BQO, ShQO jáne Soltústik Qazaqstan oblystarynan, sondaı-aq, QHR, Reseı federatsııasynan kelgen aqyndar qatysady. 

Aqyndardyń jasyna shekteý qoıylmaıdy. Árbir jupqa 15-20 mınýtqa deıin ýaqyt bólinedi. Bas júldege shetel avtokóligi tigilip otyr. Júldeli oryndarmen birge tórt aqynǵa yntalandyrý syılyǵy berilip, bir aqynǵa «Akademık Jasan Zekeıuly atyndaǵy arnaıy júlde» tapsyrylady.