Astanada 13 el stýdentteri tsıfrlyq dáýirge arnalǵan úzdik quqyqtyq sheshimder usyndy

Іs-shara Memleket basshysy jarııalaǵan Tsıfrlandyrý jáne jasandy ıntellekt jyly aıasynda uıymdastyryldy. «Bolashaq quqyǵy» taqyrybyndaǵy baıqaý Ázerbaıjan, Germanııa, Grýzııa, Kanada, Qazaqstan, Qyrǵyzstan, Qytaı, Malaızııa, Ózbekstan, Reseı, Rýmynııa, Úndistan jáne Shrı-Lanka joǵary oqý oryndarynyń 23 komandasyn biriktirdi. Jarys barysynda stýdentter jańa tehnologııalardyń zań júıesine, quqyq qaǵıdattaryna, etıka men adam quqyqtaryna áserin zerttedi.

— Biz MNU-da bolashaǵymyz jańashyldyqdy jasaýdan, suraq qoıýdan jáne kóshbasshy bolýdan qoryqpaıtyndarǵa tıesili ekenine senimdimiz. Eki kún boıy InternationalLegathon MaxUP saıysynda qatysýshylar quqyqtyń bolashaǵy búginnen bastap olardyń ıdeıalary, sheshimderi jáne standartty emes oılaýǵa daıyndyǵy arqyly qalyptasatynyn kórsetti. Biz quqyq pen tehnologııa birge damıtyn dáýirde ómir súrýdemiz. Bul jańa shynaıylyqta tek qana quqyqty bilý jetkiliksiz, ony qaıta túsinýge daıyn bolý qajet, — dedi MNU Basqarma tóraǵasy Talǵat Nárikbaev.

«Lex Fantastica» debat formatyndaǵy baıqaýdyń birinshi kezeńi «Astana» halyqaralyq qarjy ortalyǵynyń Sotynda uıymdastyryldy. Pikirsaıys barysynda stýdentter metaǵalamsharlardyń menshik ıeleriniń jaýapkershiligi men ony naqty bir memleketterdiń balamasy retinde qarastyrý, vırtýaldy aktıvterdi retteý jáne vırtýaldy bolmystyń menshigin qorǵaý, sondaı-aq jasandy ıntellekt sýdıadan bas tartý men vırtýaldy shyndyqta bolý ýaqytyn shekteýdiń zańdylyǵy týraly dálelder keltirdi. Jarystyń aqtyq kezeńi men Grand-fınal MNU-da ótti.

Fınalǵa qatysýshylar avtonomdy kólikti paıdalaný, sıntetıkalyq kontent jáne ekonomıkadaǵy jasandy ıntellektini retteıtin normalardy ázirleý boıynsha óz ıdeıalaryn usyndy. Tóreshiliktiń beıtaraptyǵyn saqtaý úshin qatysýshylar sóz sóıleý barysynda óz eli men ýnıversıtetin tanytqan joq.

Komandalardyń usynystaryn ádilet, ǵylym jáne joǵary bilim vıtse-mınıstrleri, Joǵarǵy Sot sýdıasy, jetekshi zań fırmalarynyń seriktesteri, halyqaralyq kompanııalary, damý ınstıtýttary, sondaı-aq dıplomatııa jáne bilim berý salalarynyń ókilderi baǵalady.

— MNU — jasandy ıntellektini zańdastyrýdyń normatıvtik quqyqtyq sheńberi týraly máseleni kótergen alǵashqy ýnıversıtet. Eń qyzyǵy, baıqaýǵa túrli elderden osy máselelerdi sheshetin komandalar kóp jınaldy. Qazaqstanda jasandy ıntellekt týraly zań qabyldanǵany belgili. Osyndaı is-sharalar esebinen biz qazirgi zańnamaǵa taǵy bir ret qarap, zańǵa táýeldi normatıvtik quqyqtyq aktilerdi pysyqtaýǵa nemese jetildirýge bolatyn jańa normalardy ala alamyz, — dedi QR Ǵylym jáne joǵary bilim vıtse-mınıstri Dınara Şeglova.

Іs-shara uıymdastyrýshylary ýnıversıtet professorlary respýblıkanyń normashyǵarmashylyq protsesinde paıdalaný úshin retteýshilik saıasat qujattary retinde qatysýshylardan jınalǵan barlyq usynystardy rásimdeıtinin atap ótti.

Saıys qorytyndysy boıynsha orys lıgasynda Ál-Farabı atyndaǵy Qazaq ulttyq ýnıversıtetiniń (Qazaqstan), Maqsut Narikbayev University (Qazaqstan) jáne V. F. ıAkovlev atyndaǵy Oral memlekettik zań ýnıversıtetiniń (Reseı) komandalary kósh bastady, al aǵylshyn lıgasynda úzdik nátıjelerdi Malaııa ýnıversıtetiniń (Malaızııa), Rýmyn-amerıkan ýnıversıtetiniń (Rýmynııa) jáne Makgıll ýnıversıtetiniń (Kanada) stýdentteri kórsetti. Konkýrstyń jeńimpazy Malaızııanyń tuńǵysh jáne eń bedeldi joǵary oqý orny — Malaııa ýnıversıtetiniń komandasy atandy.

— Mundaı baıqaýlar álem jastary úshin óte mańyzdy. Usynylǵan zań salasyndaǵy keıs óte qyzyq boldy. Bastapqyda bizde onyń qanshalyqty shynaıy ekenine senim bolǵan joq, biraq spıkerlerdiń sózderin tyńdaı otyryp, quqyqtyq júıege jasandy ıntellekt tehnologııalaryn engizý kezinde bizge shynymen de jańa retteý tetikteri qajet bolatyny týraly oılana bastadyq. Qazir quqyqtyq júıeler kóp jaǵdaıda artta qalyp otyr jáne jas urpaqqa bolashaq úshin ınnovatsııalyq sheshimderdi usynýǵa týra keledi, — dedi Makgıll ýnıversıtetiniń (Kanada) stýdenti Endrıý Tszıasın Chen.

Saıystyń jalpy júlde qory bes mıllıon teńgeden asty. Baıqaý AHQO Soty, «Kazakhstan Bar Association» zań konsýltanttar palatasy jáne «Baker McKenzie» halyqaralyq zań fırmasynyń qoldaýymen ótti. Sondaı-aq konkýrsqa Qazaqstannyń Damý banki, «Unicase», «KP Disputes», «Turkenov Consulting» zań fırmalary jáne advokat Rena Kerimova qoldaý bildirdi.

Aıta keteıik, International Legathon MaxUP alǵash ret 2025 jyly ótken bolatyn.

Osyǵan deıin Kazinform agenttigi Maqsut Narikbayev University stýdentterine tóte jazý álipbıin úıretý jobasyn iske asyryp jatqanyn jazǵanbyz. Josparǵa saı, 300-den astam bolashaq zańger osy jazýdy oqyp, úırenedi.