Astanada 13 áleýmettik nysan kógildir otyn jelisine qosyldy - ákim

ASTANA. QazAqparat - Elorda ákimi Altaı Kólginov áleýmettik jelidegi paraqshasyna qaladaǵy áleýmettik nysandar gazǵa qosylyp jatqanyn jazdy, dep habarlaıdy QazAqparat tilshisi.

«Elordanyń eldi mekenderinde avtonomdy jylý kózderi arqyly jylytylǵan áleýmettik nysandar bar. Olar avtonomdy jylý kózderi arqyly, ıaǵnı, kómir nemese birneshe ese qymbat dızel otyny arqyly jylytyldy.

20 áleýmettik nysannyń (Almaty jáne Saryarqa aýdany) 13 nysany gazǵa aýystyryldy, qalǵan 7 nysan boıynsha iske qosý-jóndeý jumystary júrgizilýde. Olardyń qatarynda eldi mekenderdegi birqatar kópqabatty turǵyn úılerdi jylytqan 3 aýdandyq jylý qazandyǵy da bar. Bul obektilerdi gazǵa aýystyrý esebinen jalpy únemdeý jylyna 1 mlrd teńgeden asady», - delingen qalabasynyń paraqshasynda.

Mysaly, buryn №40 mektep dızeldik otynmen jylytýǵa jylyna 160 mıllıon teńgege jýyq qarjy jumsasa, gazben bul soma shamamen 4 esege azaıǵan. Al, «Sharapat» áleýmettik qyzmet kórsetý ortalyǵynyń únemdeýi jylyna 60 mıllıon teńgeden asady.

Altaı Kólginov úılerin gazǵa aýystyrǵan Kóktal-1 aýdanynyń turǵyndarymen kezdeskenin de atap ótken. Turǵyndar kómir satyp alýdyń, kúldi tazalaýdyń, kúni boıy úıde otyndy qadaǵalaýdyń qajeti joq ekendigin, sondaı-aq, gazdandyrý ekologııalyq taza jáne qaýipsiz ekenin jetkizgen.

«Kún saıyn gazǵa qosylǵan úılerdiń sany artýda. Búgingi kúni gazǵa 6 myńnan astam úı qosyldy. Saryarqa jáne Almaty aýdandary gazben tolyq qamtamasyz etildi. Ol úshin 680 km astam gaz taratý jelileri salynyp, oramishilik jeliler jóndeldi.

Baıqońyr jáne Esil aýdandarynda gaz qubyryn salý jumystary júrgizilýde. Aǵymdaǵy jyly aýdan qazandyqtaryna «Turan», «Telman» jáne «Ilınka» (Úrker), «Óndiris», «Telman», «Prıgorodnyı», «Family Village», «Garden Village» shaǵyn aýdandaryna gaz tartý jelileriniń qurylysy bastaldy. «Shubar» shaǵyn aýdanynda jobalaý jumystary júrgizilýde», - degen ákim.

Ondaǵy málimetterge qaraǵanda, turǵyn úılerdi gazǵa qosýdy jeńildetý úshin buǵan deıin birqatar sharalar qabyldandy: úılerdi gazǵa qosý úshin qujattar tizimin eki ese qysqardy; halyqtyń muqtaj sanattaryna bóletin soma eki ese ulǵaıdy (430 myńǵa deıin); gazdy esepteý aspaptary (eseptegishter) tegin beriledi; úıdi gazdandyrý úshin bólip tóleý jáne bankter arqyly paıyzsyz nesıe berý jobalary bar.

Elordany gazdandyrý Memleket basshysynyń baqylaýynda. Gazdandyrý qalanyń ekologııasyn edáýir jaqsartyp qana qoımaı, jeke sektor turǵyndary úshin qolaıly jaǵdaı jasaýǵa múmkindik beredi.