Astanada 1200 jyldyq tarıhı kezeńdi qamtıtyn túrkilerdiń kóne jádigerleri kórmege qoıyldy
ASTANA. 31 qazan. QazAqparat - 2012 jyldyń 31 qazanynda QR Tuńǵysh Prezıdentiniń murajaıynda «Qazaqstan Respýblıkasy Tuńǵysh Prezıdentiniń Qory» Qoǵamdyq qorynyń qoldaýymen uıymdastyrylǵan «Túrki álemi» atty kórme ashyldy.
Kórmege arheologııalyq zertteýler barysynda tabylǵan túrkilerdiń kóptegen jádigerleri, tarıhı-mádenı murasy qoıylǵan. Onda Qarluq, Qarahan jáne Qypshaq memleketi sııaqty ortaǵasyrlyq memleketterdiń mádenıetine tıesili tas músinder, túrik rýna jazbalary men basqa da arheologııalyq artefaktiler usynylǵan.
«Bul artefaktiler Shyǵys Qazaqstannan, OQO, BQO, Otyrar qalasynyn jınalǵan. Olardyń sany shamamen 200-den asady. Máselen, 20-dan astam altynnan jasalǵan zergerlik buıymdar, onshaqty qysh qumyralar, antropologııalyq músinder, Qarataýdan kelgen tas músinder, qarý-jaraq, at ábzelderi, saýyt-turmandar bar. Batys Qazaqstannan kelgen toptamanyń ózi 100-den asady. Qypshaq jaýyngeriniń bir ózine jeke kórme jasaýǵa bolady», - deıdi jobanyń ǵylymı keńesshisi, «Nazarbaev ortalyǵynyń» ǵylymı qyzmetkeri, tarıh ǵylymdarynyń doktory, professor Aıman Dosymbaeva.
Degenmen, onyń aıtýynsha, eń basty másele sanda emes, tutas bir jınaqy kórme uıymdastyrý bolǵan. «Bul jádigerler I-XII ǵasyrlardy, ıaǵnı 1200 jyldyq tarıhı kezeńdi qamtıdy», - dep atap ótti ol.
