Astanada 1200-den astam kórneki jarnama zańsyz ornatylǵan
«1 qańtardan qyrkúıekke deıin jarnama taratýshylar 241 jańa habarlama berdi. Onyń 119-y esepke alyndy, 95-ine eskertý jiberildi. Astana aýmaǵynyń kórneki jarnamasyn ornalastyrý qaǵıdalaryn iske asyrý aıasynda basqarma memlekettik kirister departamentiniń, qalalyq orta sapasyn baqylaý basqarmasynyń, tilderdi damytý jáne muraǵat basqarmasynyń, aýdan ákimdikteriniń mamandarymen birlesip, habarlamastan ornatylǵan syrtqy kórneki jarnama obektilerin jáne ǵımarat ıeleriniń kelisiminsiz ornalastyrylǵan kórneki jarnama obektilerin anyqtaý jumysyn júrgizip jatyr», – dedi Astana qalasy sáýlet, qala qurylysy jáne jer qatynastary basqarmasy basshysynyń orynbasary Ǵabbas Berǵalıev baıandama jasady.
Onyń aıtýynsha, qalanyń birneshe kóshesinen tıisti organdarǵa habarlamastan ornatylǵan 1 252-den astam syrtqy kórneki jarnama tabylǵan.
«Osy másele boıynsha jarnama taratýshylar arasynda túsindirý jumystary júrgizilip, 602 jarnama nysany joıyldy», - dedi Ǵabbas Berǵalıev.
Qalalyq máslıhat hatshysy Erlan Kanalımov bul máseleniń jyl saıyn qaıtalanyp kele jatqanyn eske salyp, qalanyń kóringen jerine «dóńgelekti jarnama» ornatýdy kásipke aınaldyryp alǵan tulǵalardy anyqtaýdy usyndy.
Sondaı-aq, elorda kóshelerine ataý berý máelesi sylbyr júrip jatqanyn synǵa aldy.
«Ózi aınaldyrǵan 1500 kóshe bar. Sonyń áli 300-den astamyna ataý berip úlgermegensizder. Shıraqtaý qımyldaý kerek», - dedi máslıhat hatshysy.
Otyrysqa qatysýshylar máseleni kezekten tys prezıdent saılaýynan keıin tıisti organdardyń ókilderiniń túgel qatysýymen qaıta qaraý kerek degen sheshimge keldi.
