Astanada 12 jýrnalıst akkredıtteýdiń keıbir qaǵıdaty zańǵa qaıshy dep sotqa shaǵymdanǵan

ASTANA. KAZINFORM – Astana qalasynyń azamattyq ister jónindegi aýdanaralyq soty 12 jýrnalıstiń QR Mádenıet jáne aqparat mınıstrligine qatysty normatıvtik-quqyqtyq aktilerdiń keıbir bólikteri zańǵa qaıshy jáne jaramsyz dep taný týraly talap qoıý boıynsha isti qarady. Bul týraly sottyń baspasóz qyzmeti málim etti.

Astanalyq jýrnalıster akkredıtteýdiń keıbir úlgilik qaǵıdalaryn jaramsyz dep tanylýy tıis degen talappen sotqa júgingen. Onda «Jýrnalısterdi (buqaralyq aqparat quraldarynyń ókilderi) akkredıtteýdiń úlgilik qaǵıdalaryn bekitý týraly» Mınıstr buıryǵynyń 4-tarmaǵy; Úlgilik qaǵıdalardyń 11-tarmaǵynyń 1) tarmaqshasy qaralǵany belgili boldy.

Astana qalasynyń azamattyq ister jónindegi aýdanaralyq soty 2024 jylǵy 20 tamyzda jýrnalısterdi akkredıtteýdiń úlgilik qaǵıdalary bekitilgenin, olar qol qoıylǵan sátten bastap qoldanysqa engizilgeni kórsetilgenin alǵa tartady. Al, talapkerler buıryq ádilet organdarynda memlekettik tirkeýden buryn jáne resmı jarııalanǵannan buryn zańsyz qoldanysqa engizilgen dep sanaıdy. 

Sondaı-aq Úlgilik qaǵıdalarda akkredıttelgen jýrnalıstiń mindetteriniń tizbesi kózdelgen, onyń ishinde akkredıtteýge tıisti ótinish kelip túsken BAQ-ta ǵana taratý múmkindigi týraly kórsetilgen. Osy talaptardy eki nemese odan da kóp ret buzý jýrnalısti turaqty akkredıtteýden aıyrýǵa ákep soǵady. 

Talapkerlerdiń pikirinshe, Úlgilik qaǵıdalardyń atalǵan tarmaqtary basqa BAQ-ta, onlaın-platformalarda, áriptesterimen, dostarymen áńgimelesýlerde (chattarda) aqparat taratýǵa baılanysty sóz bostandyǵyna quqyqty shekteıdi. 

«Mınıstrlik sholýda belgili bir BAQ-pen eńbek qatynasynda turatyn akkredıttelgen jýrnalıst olardan akkredıtatsııa ala otyryp, eńbek mindetterin atqaratynyn kórsetti. Tıisinshe, birneshe BAQ-ta jarııalanatyn bolsa, olardyń árqaısysynan akkredıtatsııa alýy kerek», — delingen habarlamada. 

Sottyń sheshimimen talap qoıýshylardyń usynysy qanaǵattandyrylmady.  

«Sot qorytyndylary akkredıtteý qaǵıdalary sóz bostandyǵyna konstıtýtsııalyq quqyqty shektemeıdi, tek akkredıttelgen jýrnalısterdiń aqparat alý jáne taratý tártibin retteıdi. Bul „Buqaralyq aqparat quraldary týraly“ Zańnyń 28-babyna sáıkes Mınıstrliktiń tıisti quzyretimen bekitilgen», — dep habarlady Astana qalasynyń azamattyq ister jónindegi aýdanaralyq sotynan. 

Osylaısha, atalǵan bapta ýákiletti organ jýrnalısterdi akkredıtteýdiń úlgilik qaǵıdalaryn bekitetini anyqtaldy.

Sonymen qatar, akkredıtteý rásimi barlyq BAQ jýrnalısterine teń sharttarda aqparat berýge baǵyttalǵan. Qaǵıdalar aqparatty basqa jolmen taratýǵa tyıym salmaıdy, mysaly, áleýmettik jelilerde.

Talap qoıýdyń ekinshi bóligi boıynsha «Quqyqtyq aktiler týraly» Zańnyń 42-babyna sáıkes mınıstrlerdiń normatıvtik quqyqtyq buıryqtary, eger quqyqtyq aktiniń ózinde ózgeshe kózdelmese, olar alǵash resmı jarııalanǵan kúnnen keıin kúntizbelik 10 kún ótken soń qoldanysqa engiziledi.

Atalǵan qaǵıdalar 2024 jylǵy 20 tamyzda bekitildi — ıaǵnı «Quqyqtyq aktiler týraly» Zańnyń normalaryna sáıkes qoldanysqa engizýdiń ózge merzimi belgilengen.

Osy Qaǵıdalardy resmı jarııalanǵanǵa deıin qoldanysqa engizý talapkerlerdiń quqyqtaryn buzbaıdy jáne normatıvtik quqyqtyq aktiniń jaramsyzdyǵyna ákep soqpaıdy. 

Sheshim zańdy kúshine engen joq.

Buǵan deıin habarlanǵandaı, BAQ týraly jańa zańda qandaı ózgerister engizilgenin oqı alasyz. 

Al, blogerler BAQ ókili retinde tirkelip, jumys isteı ala ma oqı otyryńyz.