Astanada 12 kóshede Bus Line jolaǵy engiziledi
ASTANA. QazAqparat - Mamyr aıynyń ekinshi jartysynda elordanyń taǵy 12 kóshesine Bus Line jolaǵy engiziledi. Bul týraly búgin Astana qalalyq jolaýshylar kóligi basqarmasynyń bastyǵy Bekmyrza Igenberdınov málim etti, dep habarlaıdy QazAqparat.
«EKSPO aıasynda 12 ýchaskede Bus Line jolaǵyn engizetin bolamyz. 20 mamyrdan Saryarqa, Turan, Beıbitshilik dańǵyldarynda, 27 mamyrdan Táýelsizdik, Saraıshyq, Táshenov, Jumabaev, Qabanbaı batyr dańǵyldarynda, al 3 maýsymnan bastap jańa joldardyń salynýyna baılanysty Nájimedenov pen Baıtursynov kóshelerinde jáne Respýblıka dańǵylynda arnaıy avtobýs jolaqtary qoldanysqa engiziledi»,- dedi Igenberdınov.
Basqarma basshysynyń aıtýynsha, mundaı sheshim jol qozǵalysy qaýipsizdigin arttyrady, avtobýstardyń qozǵalys ýaqytyn 20 paıyzǵa jaqsartady. Soǵan sáıkes jolaýshylardyń aıaldamada avtobýs kútý ýaqyty qysqarady.
«Sonymen qatar EKSPO ótetin kezeńde Qabanbaı batyr dańǵylymen Syǵanaq kóshesinen bastap aınalma jol aıyryǵyna deıin solǵa burylýǵa shekteý qoıý baǵdarlamasyn ázirledik. Bul dańǵyl boıyndaǵy sol jaqqa burylýdy shekteý árbir retteletin qıylysta eki baǵytta da ornatylǵan. Buǵan qosa Rysqulov kóshesinen aınalma jol aıyryǵyna qaraı júrip kele jatqanda keri aınalyp ketýge shekteý qoıylǵan»,- dedi ol.
