Astanalyq polıtsııa qyzmetkerleri baspanaly boldy
ASTANA.KAZINFORM - Astana qalasynyń ákimi Jeńis Qasymbek Instagram paraqshasynda polıtsııa qyzmetkerlerine páter kilti tabystalǵany týraly jazdy, dep habarlaıdy elorda ákimdiginiń resmı saıty.
-Elordamyzdyń damý jolyndaǵy negizgi basymdyqtardyń biri – turǵyndardyń qaýipsizdigi. Memleket basshysynyń bastamasymen qolǵa alynǵan «Zań men tártip» qaǵıdaty quqyq qorǵaý organdary qyzmetkerleriniń joǵary kásibıligi men jaýapkershiliginiń arqasynda tabysty iske asyp keledi. Polıtsııa qyzmetkerlerin kásibı merekesimen quttyqtap, olardyń eńbegine alǵys bildirdim,-delingen habarlamada.
Sonymen qatar elorda ákimi polıtsııanyń kadrlyq áleýeti men materıaldyq-tehnıkalyq bazasyn nyǵaıtý jumystary júrip jatqanyn aıtty. Ótken jyldyń ózinde qosymsha 175 shtattyq birlik bólngen, sondaı-aq, byltyr 14 jańa ýchaskelik polıtsııa pýnktin ashyp, 200-den astam qyzmettik avtokólik tabystalǵan.
-Qalanyń Polıtsııa departamenti qyzmetkerlerin áleýmettik qoldaý máselelerine erekshe nazar aýdaramyz. Sońǵy jyldary polıtseılerge shamamen 100 qyzmettik páter berildi. Búgin uzaq jyldar boıy adal qyzmet etip, qala turǵyndarynyń qaýipsizdigin qamtamasyz etip júrgen tártip saqshylaryna taǵy 11 páterdiń kilti tabystaldy. Jalpy, bıyl 26 páter bólindi. Polıtsııa qyzmetkerlerine atqarǵan adal qyzmeti, kásibıligi men jaýapkershiligi úshin rızashylyǵymdy bildiremin. Olarǵa zor densaýlyq, amandyq, qyzmette tolaǵaı tabys tileımin!» – dep jazdy Jeńis Qasymbek.
Aıta keteıik, búgin - Qazaqstan polıtsııasy kúni. 1992 jyly 23 maýsymda QR Joǵarǵy Keńesi «Qazaqstan Respýblıkasynyń ishki ister organdary týraly» Zańdy qabyldady. Bul Qazaqstan polıtsııasynyń qyzmeti men mindetin aıqyndaǵan alǵashqy quqyqtyq akt boldy. 2007 jylǵy 5 maýsymda Qazaqstan Respýblıkasy Prezıdentiniń Jarlyǵymen 23 maýsym Polıtsııa kúni bolyp bekitildi.
