Astanada 11 myńnan astam muǵalim eńbek etedi - tamyz konferentsııasy
ASTANA. 20 tamyz. QazAqparat - Jańa oqý jyly árbir pedagogtyq ujymnyń ómirindegi jańa kezeń.
Dástúrli tamyz jınalysy elimizdegi muǵalimderdiń pikir almasyp, aldaǵy oqý jylynyń baǵyt-baǵdaryn anyqtap alatyn mańyzdy basqosýy bolyp tabylady.
Bul týraly búgin Astanadaǵy Kongress-Holl saraıynda «Sapaly bilim men tárbıe berý - Qazaqstannyń memlekettik saıasatynyń basymdyǵy» taqyrybynda ótken pedagog qyzmetkerlerdiń tamyz jınalysynda Astana qalasy Bilim basqarmasynyń basshysy Ásıma Bımendına aıtty.
«Sońǵy 15 jyl ishinde Astanada jáne elimizde bilim salasynyń damýy úshin kóptegen ıgi sharalar qabyldandy. Elordadaǵy bilim berý uıymdary edáýir ulǵaıyp, búginde 280 nysanǵa jetti. Sondaı-aq, mundaǵy muǵalimderdiń sany 11 142-ge jetti», - dep atap ótti Á. Bımendına.
Onyń aıtýynsha, Astanadaǵy bilim berý salasyna bólinetin qarajat ta aıtarlyqtaı ósken.
«Búginde bilim berý júıesine bólinetin qarajat 19 mlrd. teńgege jetip otyr. Sonymen qatar, joǵary sanatty ustazdardyń jalaqylary artý ústinde. Jalpy alǵanda elordadaǵy bilim sapasynyń da ósý qarqyny jaqsy nátıjeler kórsetýde», - dedi ol.
Aıta ketý kerek, jınalysqa Astana qalasynyń ákimi Imanǵalı Tasmaǵambetov, QR Bilim jáne ǵylym mınıstrliginiń jaýapty hatshysy Álııa Ǵalymova, depýtattar, elorda aýdandarynyń ákimderi, JOO basshylary, ardager ustazdar jáne taǵy basqalary qatysty.
