Astanada 11 myń 700 sheteldik azamatqa vakansııa bar
ASTANA. QazAqparat - Qazaqstanda shetel azamattaryn jumysqa tartýǵa belgili bir mólsherde kvota bólinedi. Astanada sheteldikterge suranys 11 myń 700 adamdy quraıdy. Bul týraly qalalyq Jumyspen qamtý, eńbek jáne áleýmettik qorǵaý basqarmasynyń basshysy Ermek Ospanov máslıhattyń kezekten tys sessııasynda aıtty, dep habarlaıdy Elorda ınfo.
Ermek Ospanovtyń aıtýynsha, sheteldik jumys kúshi bilimdilik deńgeıin qosa alǵanda, jalpy tórt sanatqa bólinedi. Sheteldikterdi jumysqa tartýǵa ruqsat beretin arnaıy komıssııa qurylǵan. Onyń quramyna qalalyq máslıhattan depýtat Gúlnár Danbaeva engen.
«Kvota men komıssııa ne úshin kerek? Eń aldymen, sheteldikterdiń jumysqa tartý úderisin baqylap otyrý, belgilengen mólsherden asyrmaý úshin qajet. Ekinshiden, eńbek naryǵymyzdy qorǵaý úshin kerek. Ózimizdiń el azamattaryn jumyspen qamtýǵa basymdyq berip otyrmyz. Al qazir shamamen alǵanda 2500 sondaı adam jumyssyz retinde tirkeýde tur. Sheteldikterge jumysqa ruqsat bergende de bárinen buryn bizdiń mamandardy úırete alatynyna nazar aýdaramyz», - dedi Ermek Ospanov.
Osydan bes jyl buryn QR Іshki ister mınıstrligi Kóshi-qon komıtetiniń usynysymen Astanada oralmandardy beıimdeý máselesin sheshetin vedomstvoaralyq komıssııa quryldy. Alaıda qazirgi tańda atalmysh organǵa túsip jatqan ótinishter joq. Sol sebepten komıssııa jumyssyz otyr. Oralmandardy beıimdeý isimen qalalyq Jumyspen qamtý, eńbek jáne áleýmettik qorǵaý basqarmasy aınalysýda. Sessııa barysynda joǵarydaǵy komıssııa jumysyn toqtatý máselesi qaralyp, depýtattar bul sheshimdi biraýyzdan qoldady
