Astanada 11 ata-ana balalaryn túnde oıyn-saýyq oryndarynda júrýine jol bergeni úshin jazaǵa tartyldy - ІІD
ASTANA. Aqpannyń 16-sy. QazAqparat /Jasulan Amanbaıuly/ - Elordada 11 ata-ana kámeletke tolmaǵan balalaryn tún jamylǵanda oıyn-saýyq oryndarynda júrýine jol bergeni úshin jazaǵa tartyldy. Іshki ister departamenti aqpannyń 15-i men 19-y aralyǵynda Astana aýmaǵynda «Mekteptegi quqyq tártibi» atty jedel-saýyqtyrý sharasyn uıymdastyrdy.
Sharanyń alǵashqy kúninde túrli quqyq buzýshylyqtarǵa baılanysty 77 jasóspirim ishki ister organdaryna jetkizildi. Kámeletke tolmaǵan balalardyń 33-i jáne eresekterdiń 38-i ákimshilik sharalarǵa tartyldy.
Keshe qalanyń barlyq bilim berý mekemeleri, kompıýterlik klýbtar, ınternet-kafe, restorandar, syrahanalar men túngi klýbtar tekseriske alyndy. Tún jamylǵanda oıyn-saýyq oryndarynda kámeletke tolmaǵan jasóspirimderdiń júrýine jol bergen 5 laýazymdy tulǵa jáne 11 ata-ana ákimshilik jazaǵa tartyldy.
Al «Alan» dámhanasynda 1989 jyly týǵan er kisi 17 jastaǵy qyzben birge alkogoldi ishimdik iship otyrǵan jerinde ustalyp, polıtseıler oǵan qatysty «Kámeletke tolmaǵan jasóspirimdi alkogoldi ishimdik ishýge baýlydy» degen bap boıynsha materıal daıyndap, isti sotqa jiberdi.
Sharanyń maqsaty jasóspirimder arasyndaǵy jasalatyn qylmystardyń aldyn alyp, olardyń esirtki men spırtti ishimdikterdi paıdalaný jaǵdaılaryna tosqaýyl qoıyp, oqýǵa barmaı júrgen jastardy anyqtaý bolyp otyr. Sonymen qatar atalmysh shara aıasynda jasóspirimderge temeki men spırtti ishimdikter satý áreketteriniń aldyn alý maqsatynda reıdter uıymdastyrylady.
