Astanada 10G jelisiniń testileý nátıjesi jarııalandy

ASTANA. KAZINFORM – Astana qalasy ákimdigi 10G jelisin synaqtan ótkizýdiń aldyn ala nátıjelerin jarııalady.

Málimetke sáıkes, tekseris jeliniń joǵary jyldamdyǵy men turaqtylyǵyn rastady. Optıkalyq baılanys arqyly júrgizilgen ólsheý kezinde júkteý jyldamdyǵy 9500 Mbıt/s, al keri júkteý 9400 Mbıt/s deńgeıinde tirkelgen.

Speedtest servısi arqyly alynǵan nátıjelerge súıensek, Steam platformasynan kólemi 11 gıgabaıt bolatyn qosymsha nebári 30 sekýndta júktelgen. Jeliniń kóp arnaly júkteý kezinde de turaqtylyǵy baıqaldy.

— Qazirgi kezeńde mamandar eleýli tehnıkalyq nemese uıymdastyrýshylyq kedergiler anyqtamady. Degenmen 10G jelisiniń tolyqqandy jumys isteýi úshin tıisti ınfraqurylym qajet, derekterdi joǵary jyldamdyqta jetkizýdi qamtamasyz etetin optıkalyq kabelder men jabdyqtar bolýy shart, – delingen ákimdiktiń Kazinform saýalyna bergen jaýabynda.

Ákimdik ókilderi qazirgi qurylǵylardyń barlyǵy mundaı jelimen jumys isteı almaıtynyn atap ótti. Baılanys operatorlaryna da jabdyqtarynyń bir bóligin jańǵyrtý qajet bolady.

Búginde tehnologııa pılottyq rejımde synaqtan ótýde. Ol birneshe aıǵa sozylýy múmkin. Nátıjesinde test aımaǵyn keńeıtý merzimi men kezeńderi anyqtalady.

Josparǵa sáıkes, Astananyń aýdandary, iri nysandar men bıznes-ortalyqtar jetekshi baılanys operatorlarynyń qatysýymen kezeń-kezeńimen qosylady. Ákimdikte basqa da tehnologııalyq seriktestermen qosymsha pılottyq jobalardy iske qosý múmkindigi qarastyrylyp jatyr.

Aıta keteıik, buǵan deıin poıyz jolaýshylary OneWeb jáne Starlink ınternetimen qalaı qamtamasyz etiletinin habarlaǵanbyz.