101.4 FM tolqynynda «Áıelder Geographic» atty jańa radıobaǵdarlama iske qosyldy
ASTANA. KAZINFORM - Búgin Jibek Joly (101.4 FM - red.) radıosynda apta saıyn shyǵatyn jańa «Áıelder Geographic» jobasynyń alǵashqy habary ótti. Bul - qazirgi qoǵamdy qalyptastyrýshy áıelderdiń shynaıy oqıǵalary týraly baǵdarlama, ıaǵnı sport, bıznes, mádenıet, ǵylym, áleýmettik ister jáne saıasat salasynda jetistikke jetken áıelderge arnalǵan.
Baǵdarlamada keıipkerdiń ómir joly, tańdaýy, jeńisi baıandalady.
Áıel adam turaqty transformatsııanyń sımvoly, kópshilik úshin motıvatsııa men kúsh-jigerdiń kózi retinde beınelenedi. Ashyq suhbat barysynda jeke oqıǵalar arqyly áıelderdiń qoǵamdaǵy róli men mańyzdylyǵy týraly oı qozǵalady.
Jobanyń negizgi tujyrymdamalyq ereksheligi - eki tilde habar taratý, ıaǵnı bir mezgilde qazaq jáne orys tilinde júrgiziledi.
Jobanyń avtory jáne júrgizýshisi - Azamat Imashev. Ol baǵdarlamany Oljas Pshenbaevpen jáne Nurlan Kýnafınmen birge júrgizedi.
Eske salsaq, Prezıdent teleradıokesheniniń quramyndaǵy Jibek joly radıosynda «Klıkbeıt» dep atalatyn joba bastalǵan bolatyn.