Astanada 1000-ǵa jýyq adam narkologııalyq esepte tur

ASTANA. KAZINFORM – Astana qalasy Qoǵamdyq densaýlyq saqtaý basqarmasy basshysynyń orynbasary Aınur Tóleýova elordada narkologııalyq esepte turǵan adamdardyń resmı statıstıkasyn atady.

- Búgingi tańda elordada psıhıatr-narkologtyń baqylaýyndaǵy 908 adam psıhıkalyq belsendi zattardy tutyný saldarynan psıhıkalyq densaýlyǵyna aqaý túsken jan retinde dınamıkalyq esepte tur. Onyń ishinde 146 áıel, 3 jasóspirim bar. Aǵymdaǵy kezeńde sıntetıkalyq esirtki qoldanatyn taǵy 18 adam tirkeldi. Bul byltyrǵydan 28,6 paıyz kóp. 122 adam statsıonarlarda erikti em aldy. Onyń 24 paıyzy medıtsınalyq-áleýmettik ońaltýdan ótti, - dedi ol óńirlik kommýnıkatsııalar qyzmetinde ótken baspasóz máslıhatynda.

Sondaı-aq, basqarma ókili esirtkiniń keıbir túrin adam 1-2 ret tutynǵannan keıin-aq táýeldi bolyp qalatynyn eskertti.

- Ókinishke qaraı, keıingi jyldary esirtkige táýeldilik kórsetkishteri ýshyǵyp keledi. Búgin Astanada esirtkige qarsy aılyq bastalǵanyn jarııalaımyz. Qala turǵyndarynyń bárin is-sharaǵa belsendi qatysýǵa shaqyramyz. Keler urpaqtyń densaýlyǵyn birikkende ǵana esirtkiden qorǵap qalamyz, - dedi Aınur Tóleýova.

Buǵan deıin Atyraýda 37 jastaǵy turǵyn 1 keliden astam sıntetıkalyq esirtkimen ustalǵan bolatyn.