Astanada 100 úzdik medıtsına qyzmetkeri marapattaldy (FOTO)
ASTANA. QazAqparat - Elordada medıtsına qyzmetkerleriniń tól merekesi qarsańynda Oqýshylar saraıynda úzdik dárigerlerge arnalǵan saltanaty shara ótkizildi. Qalanyń densaýlyq saqtaý salasynyń damýyna eleýli úles qosqan 100 medıtsına qyzmetkerine marapattar tabystaldy, dep habarlady qalalyq ákimdiktiń baspasóz qyzmeti.
Shara barysynda Astana qalasy ákiminiń orynbasary Ermek Amanshaev dárigerlerdi quttyqtap, sóz sóıledi.
- Bizdiń ómirimizdegi sıqyrshylar - sizder. Bizdiń tarapymyzdan, memleket tarapynan, qala ákimdigimen densaýlyq saqtaý salasyna basa nazar aýdarylady, sońǵy ýaqytta elordada atalǵan salanyń qarqyndy damýy baıqalady. Osy kúni sizderge eńbekterińiz úshin alǵys aıtyp, tól merekelerińizben quttyqtaımyn! - dedi E. Amanshaev.
Densaýlyq saqtaý salasynda kóp jyldar boıy tabysty eńbek etkeni, halyqqa sapaly qyzmet kórsetý jónindegi máselelerdi sheshýge belsendi atsalysqany úshin úzdik medıtsına qyzmetkerlerine «Densaýlyq saqtaý isine qosqan úlesi úshin», «Densaýlyq saqtaý isiniń úzdigi» tósbelgileri, sonymen qatar, Astana qalasynyń ákimi Ádilbek Jaqsybekovtiń jáne elordalyq Densaýlyq saqtaý basqarmasynyń basshysy Erik Baıjúnisovtyń atynan qurmet gramotalary men alǵys hattar tabystaldy.
Bıyl alǵash ret dárigerler bes nomınatsııa boıynsha marapattaldy. Árbir marapattaýdyń aldynda jınalǵan qaýym dárigerdiń qyzmeti týraly tolyq baıandaıtyn beınerolık tamashalady.
Medıtsına qyzmetkeriniń asqan sheberligin atap ótetin «Mamandyǵyna adaldyǵy úshin» arnaıy nomınatsııasynda Olga Zamolotova, «Biregeı operatsııa ótkizip, adam ómirin qutqarǵany úshin» nomınatsııasynda №2 qalalyq aýrýhana dárigerleriniń komandasy: Marat Jaqsylyqov, Baımahanbet Sadýov, Bolathan Lepesbaev marapattaldy.
Munymen qosa, «Dıagnostıkalaý men emdeýdiń jańa ádisin oılap tapqany úshin», «Mamandyǵyna adaldyǵy úshin - otbasylyq áýletter» nomınatsııalary belgilendi. «Jańa ómir syılaǵany úshin» nomınatsııasynda Astana qalasynyń ákimdigi №1 Perınataldy ortalyǵynyń jańa týǵan sábılerdi kútý jáne patologııalar bóliminiń meńgerýshisi Irına Tsýbenko marapattaldy.
Búgingi tańda Astanada 36 uıym medıtsınalyq qyzmetter usynady. Sońǵy 5 jylda elordada 9 medıtsınalyq mekeme salynyp, olarda 9 424 medıtsına qyzmetkeri, sonyń ishinde 3 202 dáriger jumys isteıdi. Elordalyq klınıkalarda emdeý men dıagnostıkalaýdyń jańa ádisteri udaıy engizilip otyrady, buǵan deıin tek respýblıkalyq aýrýhanalarda ǵana kórsetilip kelgen joǵary mamandandyrylǵan medıtsınalyq kómek kórsetiledi.
