Astanada 100 túp aǵash egildi

Bul bastama Halyqaralyq ekologııalyq konferentsııanyń praktıkalyq jalǵasy boldy jáne ekologııalyq mádenıetti damytýǵa jáne «Taza Qazaqstan» jalpyulttyq bastamasyn qoldaýǵa baǵyttalǵan.

Jańa kóshetter «Sharapat» áleýmettik ortalyǵy mańyndaǵy alleıaǵa egildi.

— Bul naýqan Memleket basshysynyń keshegi Joldaýynda aıtylǵan basymdyqtarmen de úndesedi. Atap aıtqanda, eldiń bolashaǵy men keler urpaq aldyndaǵy jaýapkershilik ıdeıasyna mán beriledi. Ásirese aǵa býyn men jas urpaq bir ıgi iske jumylyp otyr. Olardy biriktiretin ortaq maqsat — aınalany kógaldandyrý, — dedi «Jer elshileri» jastar ekologııalyq qozǵalysynyń jetekshisi Temirlan Maqýbaev.

Uıymdastyrýshylardyń pikirinshe, ekologııalyq ál-aýqat naqty áreketterden bastalady. Tabıǵatty qorǵaý, qoǵamdyq keńistikterdi kógaldandyrý jáne jastardy ekologııalyq bastamalarǵa tartý — turaqty bolashaqqa qosylǵan mańyzdy úles.

— Astana qalasy ákimdiginiń keńesi boıynsha soltústiktegi sýyq aımaqtarǵa tózimdi Nedzvetskıı alma sortyn tańdadyq. Sonymen qatar, aǵash otyrǵyzýmen ǵana shektelýge bolmaıtynyn da aıtqym keledi. Ony kútip-baptaý da óte mańyzdy. Biz qansha aǵash otyrǵyzdyq dep emes, sonyń qanshasy jersindi dep suraýymyz kerek. Bul úshin aldaǵy eki jylǵa jaýapkershilik alamyz. Apta saıyn kelip, olarǵa kútim jasap, qarap, sońyna deıin ósiremiz. Jalpy «Taza Qazaqstan» aıasynda sońǵy úsh jylda 3 myńnan astam kóshet ektik, — deıdi ekobelsendi Nurdáýlet Muhtarbek.

Aıta keteıik, Pavlodar óńirindegi orman sharýashylyqtarynda 3 mıllıonnan astam aǵash egildi.

Al Qostanaıda jyl basynan beri 15 mıllıonnan astam aǵash egilgen.