Astanada 100 myńnan astam zeınetker turady

ASTANA. QazAqparat – Búginde Astanada 100 myńnan astam zeınetker turady. Bul týraly qalalyq jumyspen qamtý jáne áleýmettik qorǵaý basqarmasy basshysy orynbasarynyń mindetin atqarýshy Móldir Sholatova málim etti, dep habarlaıdy QazAqparat tilshisi.

«Zeınet jasyndaǵy jandardyń ómirin jaqsartý maqsatynda memleket jáne qala ákimdigi tarapynan turaqty negizde sharalar qabyldanyp jatyr. Búginde elordada 100 myńnan astam zeınetker turady. Aýdandar boıynsha statıstıkaǵa súıensek, Almaty aýdanynda – 28 myńnan astam, Baıqońyrda – 22 myń, Saryarqada – 28 myń, Esil aýdanynda 22 myńǵa jýyq qart bar», - dedi Móldir Sholatova elorda ákimdigi alańynda ótken baspasóz máslıhatynda.

Sondaı-aq qala ákimdigi ókili elordada egde jastaǵy turǵyndarǵa arnalǵan ortalyq jumys istep turǵanyn aıtty.

«Qart adamdarǵa qoldaý kórsetý maqsatynda qala ákimdiginiń bastamasymen «Belsendi uzaq ómir súrý» ortalyǵy ashyldy. Ol jerde egde jastaǵy jandar bos ýaqytyn ótkize alady. Ortalyqta qart kisilerge arnalǵan mádenı-sporttyq jáne basqa da sharalar qarastyrylǵan. Búgingi kúni atalǵan ortalyqta 4 myńǵa jýyq kisi tirkeldi. Kún saıyn ortalyqqa 450 qart keledi. Sol sııaqty ortalyqta 27 baǵyt boıynsha túrli sektsııa jumys isteıdi. Qajetti qural-jabdyq jáne kompıýterlik synyppen qamtylǵan. Odan bólek, ónerge qyzyǵýshylar úshin shyǵarmashylyq úıirmeler bar», - deıdi ol.

Onyń aıtýynsha, budan bólek, qazaq jáne aǵylshyn tilin úırený kýrstary jumys isteıdi.

Foto: flashsiberia.com