Astanada 100 kadet áskerı ant qabyldady
ASTANA. KAZINFORM – Elordadaǵy áskerı oqý ornynda úshinshi kýrs kadetteri saltanatty jaǵdaıda Otanǵa adal qyzmet etýge ant berdi. Bul týraly Qorǵanys mınıstrliginiń baspasóz qyzmeti habarlady.
Іs-sharaǵa Qorǵanys mınıstrligi Tárbıe jáne ıdeologııalyq jumystar departamentiniń bastyǵy ádilet polkovnıgi Tileýhan Basqojaev, Áskerı bilim jáne ǵylym departamentiniń bastyǵy polkovnık Murat Oljabaev, kolledjdiń basshylyǵy men jeke quramy, Qarýly kúshterdiń ardagerleri, kadetterdiń týystary men jaqyndary qatysty.
Kadetterdi osy aıtýly oqıǵamen Halyq qaharmany otstavkadaǵy general-leıtenant Baqytjan Ertaev quttyqtady. Ol jas sarbazdarǵa áskerı ǵylymdy tereń meńgerýde tabandylyq pen aldaǵy qyzmetterine sáttilik tiledi.
Qalyptasqan dástúr boıynsha jınalǵandar Qazaqstannyń tuńǵysh Qorǵanys mınıstri armııa generaly Saǵadat Nurmaǵambetovtyń eskertkishine gúl shoqtaryn qoıdy.
– Búginde elimizde bes áskerı kolledj jumys isteıdi. Bul oqý oryndarynda jeti áskerı-eseptik mamandyq boıynsha kishi komandırler daıyndalady. Bul degenimiz qazirgi zamanǵy armııa qurylymynda kásibı serjanttardyń mańyzdy ról atqaratynyn kórsetedi, - dedi Qazaqstan Qarýly kúshteriniń bas serjanty sheber-serjant Temirbek Halyqov.
Kadetter kolledjge osydan eki jyl buryn túsken. Osy ýaqyt ishinde olar oqý pánderin meńgerip qana qoımaı, qatań áskerı tártipke úırenip, sapaly áskerı daıyndyqtan ótti. Kelesi jyly olar oqýyn aıaqtap, Qarýly kúshterdiń serjanttar qataryn tolyqtyrady.
– Biz balalarymyzdy maqtan tutamyz. Búgin olardyń qalaı ózgergenin, qandaı jetistikterge jetkenin kórip otyrmyz. Munyń barlyǵy ustazdar men komandırlerdiń eńbegi dep bilemin. Úlken ulym búgin ant qabyldasa, al kenje ulym bıyl osy kolledjge oqýǵa tústi. Ekeýine de qýanyshtymyn, olardyń naǵyz Otan qorǵaýshy azamat bolatynyna senemin, - dedi kadettiń anasy Іńkár Qaltaeva.
Úzdik túlekter bolashaqta áskerı joǵary oqý oryndarynda bilimin jalǵastyryp, ofıtser atanýdy josparlap otyr. Búgingi ant olardyń naǵyz jaýynger bolýǵa jasaǵan kezekti qadamy. Bul kópshiligi úshin bala kúnnen bergi arman. Alda jaýapty oqý jyly tur, jáne olar ony abyroımen aıaqtap, Otanǵa qyzmet etýge daıyn.
Buǵan deıin Almatyda 160-tan astam kýrsant áskerı ant bergenin jazǵan edik.