Astanada 100-den astam joba júzege asyrylyp, 8 myń jumys orny ashylady

«Astana Invest» qalalyq ınvestıtsııalardy damytý ortalyǵynyń Indýstrııalyq aımaqtardy ákimshilendirý departamentiniń dırektory Almat Álimbaıdyń aıtýynsha, № 1 Indýstrııalyq park elordadaǵy negizgi óndiristik alańdardyń biri sanalady.

— «Astana — jańa qala» arnaıy ekonomıkalyq aımaǵynyń aýmaǵynda ornalasqan № 1 Indýstrııalyq park — elordadaǵy negizgi óndiristik alańdardyń biri. Munda jalpy quny 369 mlrd teńgeden asatyn 145 joba júzege asyrylyp jatyr. Onyń 103-i jumys istep tur, 42 joba iske asyrý satysynda. 30-dan astam kásiporyn sheteldik ınvestıtsııanyń qatysýymen qurylyp jatyr, — dedi ol.

Onyń málimetinshe, arnaıy ekonomıkalyq aımaq aýmaǵyndaǵy kásiporyndarda 7 myńnan astam turaqty jumys orny ashylǵan. Júzege asyrylyp jatqan jobalar aıasynda taǵy shamamen 2,5 myń jumys ornyn qurý josparlanyp otyr.

Sonymen qatar memlekettik-jekeshelik áriptestik negizinde № 2 Indýstrııalyq park jobasy júzege asyrylýda. 2029 jylǵa deıin munda jalpy quny shamamen 500 mlrd teńge bolatyn 100-den astam jobany ornalastyrý josparlanǵan. Bul shamamen 8 myń jańa jumys ornyn ashýǵa múmkindik beredi.

Osy baǵytta Indýstrııalyq park № 1 aýmaǵynda ornalasqan «Lokomatıv qurastyrý zaýytynyń» kórsetkishteri elordadaǵy ónerkásip salasynyń jalpy ósimimen qatar qalyptasyp otyr.

Zaýyt 2009 jyldan beri Evolution serııasyndaǵy lokomotıvterdi óndiredi. Qazir munda 530-dan astam adam jumys isteıdi, óndiristik jelilerdiń qýaty jylyna 120 lokomotıv qurastyrýǵa múmkindik beredi.

Lokomotıv qurastyrý zaýytynyń óndirisi ishki naryqpen shektelmeıdi. Kásiporyn ónimderi Ázerbaıjan, Moldova, Tájikstan, Qyrǵyzstan, Túrikmenstan, Ýkraına, Mońǵolııa jáne Ózbekstanǵa jetkizilgen.

Zaýyt ákimshiliginiń basshysy Raýan Donsebaevtyń aıtýynsha, 700 lokomotıvtiń 42-si eksportqa jóneltilgen. Kásiporyn lokomotıvtermen qatar, olarǵa qajetti quramdas bólshekterdi de shyǵarady.

— 2009 jyldan beri 700-shi lokomotıvti shyǵardyq. Onyń 42-si eksportqa jóneltildi. Qazir biz lokomotıvke qajetti bólshekterdi de óndiremiz. Mysaly, Úndistanǵa 300 poıyz arbasynyń qańqasyn jetkizý jóninde kelisimshart jasaldy. Onyń shamamen 200-i jóneltildi, qalǵan 100-i bıyl jáne kelesi jyly jetkiziletin bolady, — dedi Raýan Donsebaev.

Kásiporynǵa amerıkalyq Wabtec kompanııasy ınvestıtsııa salyp keledi. Qazaqstandaǵy ınvestıtsııa kólemi 230 mln AQSh dollarynan asqan. Qarajat óndiristik qýattardy damytýǵa, tehnologııa transferine, mamandardy daıarlaýǵa jáne jergilikti jetkizýshilerdiń óndirisin damytýǵa baǵyttalǵan.

Zaýytpen baılanysty óndiristik jáne servıstik alańdarda jabdyqtar men quramdas bólshekterdi óndirý, jóndeý jáne qyzmet kórsetý baǵyttary qalyptasqan. Bul óndiristik tizbekte 1 400-den astam maman eńbek etedi.

Wabtec kompanııasynyń prezıdenti Frenn Deımon Lıdiń aıtýynsha, kásiporynnyń aldaǵy jyldarǵa arnalǵan óndiristik kelisimderi bar.

— Búginde 700-shi lokomotıvimizdi shyǵarǵanymyzdy atap ótip jatyrmyz. Aldaǵy kóptegen jyl boıy óndiristi jalǵastyrǵymyz keledi. Qazir birneshe jylǵa jasalǵan kelisimderimiz bar. Olar óndiristi aldaǵy ondaǵan jyl boıy jalǵastyrýǵa múmkindik beredi. Sondyqtan bul zaýyttyń bolashaǵy zor dep esepteımin, — dedi Frenn Deımon Lı Kazinform agenttigine bergen suhbatynda.

Onyń aıtýynsha, zaýytta alǵashqy kúnnen beri eńbek etip kele jatqan mamandar bar. Kásiporyn qazir osy kompanııalar tobynyń quramynda jumys isteıdi. Sonymen qatar ol qazaqstandyq mamandardyń biliktiligine de toqtaldy.

— Qaýipsizdik turǵysynan alǵanda, munda qyzmetkerler bir-birine qamqor bolyp, qaýipsizdik talaptaryn saqtaýǵa jaýapkershilikpen qaraıdy. Sonyń arqasynda sapaly ónimdi qaýipsiz óndirýge jáne ony tutynýshylarǵa ýaqytyly jetkizýge múmkindik bar. Bizde bilikti ári jaqsy daıyndyqtan ótken myqty eńbek ujymy bar. Qazir mańyzdy baǵyttardyń biri — jańa ónimderdi óndiriske engizý jáne bolashaqqa arnalǵan ónimderdi ázirleý. Bizdiń negizgi nazarymyz osyǵan baǵyttalǵan, — dedi ol.

Kompanııa óndiris tıimdiligin arttyrý úshin jasandy ıntellekt pen basqa da tsıfrlyq tehnologııalardy qoldanýǵa baǵyttalǵan jobalardy júzege asyryp jatyr.

— Jasandy ıntellekt pen tehnologııalardy paıdalaný arqyly óndiristi ónimdirek, qaýipsiz ári sapaly etýge múmkindik bar. Qazir osy baǵytta birneshe joba boıynsha jumys istep jatyrmyz. Bul jobalar jańa ónimderdi óndiriske tezirek engizýge jáne tutynýshylardyń qajettilikterine sáıkes ónimderdi ýaqytynda jetkizýge kómektesedi, — dep qorytyndylady kompanııa basshysy.

Aıta keteıik, Qazaqstanda vagon jasaý salasynda ónerkásiptik klaster qurylatynyn jazǵan edik.