Astanada 700-shi lokomotıv shyǵaryldy
ASTANA. KAZINFORM – Lokomotıv qurastyrý zaýytynyń tsehtarynda metall bólshekter zamanaýı lokomotıvterge aınalady. Jýrnalıster Astanada jyljymaly quramnyń qalaı jasalyp, qurastyrylatynyn óz kózderimen kórdi. Bul júzdegen mamannyń eńbeginiń nátıjesi ǵana emes, elordadaǵy mashına jasaý salasynyń damyp, óndiristik áleýettiń artyp kele jatqanyn kórsetetin mańyzdy kórsetkish.
Lokomotıv qurastyrý zaýyty Indýstrııalyq park №1 aýmaǵynda ornalasqan. 17 jyl ishinde kásiporyn elordanyń mashına jasaý salasyndaǵy negizgi óndiris oryndarynyń birine aınaldy. Búginde zaýyt jylyna 120 lokomotıvke deıin shyǵarýǵa qaýqarly.
Óndiristik tsehtarda 530-dan astam maman jumys isteıdi. Olar manevrlik, jolaýshylar jáne júk tasymalyna arnalǵan Evolution serııaly lokomotıvterdi qurastyrady.
– Osy ýaqyt ishinde biz 700 lokomotıv shyǵardyq, onyń 42-si eksportqa jóneltildi. Bul bizdiń zaýyttyń ǵana emes, Qazaqstannyń búkil mashına jasaý salasynyń maqtanyshy, – dedi «Lokomotıv qurastyrý zaýyty» AQ ákimshilik basshysy Raýan Donsebaev.
Onyń aıtýynsha, Wabtec Corporation halyqaralyq tobyna kiretin kásiporynnyń jobalyq qýaty aıyna shamamen 10 lokomotıv shyǵarýǵa eseptelgen.
– Bizdiń óndiristik qýatymyz tájirıbe júzinde rastaldy. Biz bul kórsetkishke buǵan deıin de shyqqanbyz. Bir lokomotıv janarmaı quıýsyz shamamen 600 shaqyrym jol júre alady, al tehnıkanyń eń joǵary jyldamdyǵy saǵatyna 120 shaqyrymǵa jetedi, – dedi Raýan Donsebaev.
Zaýytta shyǵarylǵan 700-shi lokomotıv «Qazaqstan temir joly» ulttyq kompanııasyna arnalǵan. Kelisimshart pen jetkizý kestesine sáıkes, ony tapsyrys berýshige osy jyldyń sońyna deıin tapsyrý josparlanyp otyr.
Kásiporyn ókilderiniń aıtýynsha, óndiristi damytýdyń negizgi baǵyttarynyń biri – lokomotıvterdiń tehnıkalyq sıpattamalaryn jaqsartý. Kelesi jyldan bastap Qazaqstanda óndiriletin dızel qozǵaltqyshtaryn engizý josparlanyp otyr. Qazir ónimniń jergilikti qamtý úlesi shamamen 40 paıyzdy quraıdy.
Óndiris birneshe negizgi kezeńnen turady. Daıyndaý tsehynda kásiporynǵa jetkizilgen metall prokaty kesilip, óńdelip, keıin lokomotıvterdi dánekerleý jáne qurastyrý kezinde paıdalanylatyn bólshekter daıyndalady.
– Bul tsehty zaýyttyń júregi deýge bolady. Munda metall prokaty kelip túsedi. Odan keıin dánekerleý men qurastyrý jumystaryna qajetti bólshekter jasalady. Tsehta zamanaýı jabdyqtar, sonyń ishinde lazerlik, koordınatalyq-teskish jáne ııý stanoktary ornatylǵan. Mundaı óndiristik park kóptegen operatsııany tikeleı kásiporynnyń ózinde oryndaýǵa múmkindik beredi, – dedi daıyndaý tsehynyń bastyǵy Azamat ıÝsýpov.
Tsehta shamamen 50 maman eńbek etedi. Óndiristik jabdyqtar Germanııa, Qytaı jáne Izraıl sııaqty birqatar elderden jetkizilgen.
Zaýyt jumys isteı bastaǵannan beri Astanada shyǵarylǵan lokomotıvter sheteldiń birqatar memleketine de jetkizildi. Jalpy eksportqa 42 lokomotıv jóneltilgen.
Lokomotıv jasaý óndirisiniń damýy elordanyń ónerkásiptik ósiminiń bir bóligine aınaldy. 2026 jyldyń qańtar-shilde aılarynda Astanada 2 trln 256,2 mlrd teńgeniń ónerkásip ónimi óndirildi. Ónerkásip óndirisiniń fızıkalyq kólem ındeksi 111,9 paıyzdy qurady.
Qalanyń eń iri ónerkásiptik alańy – «Astana – jańa qala» arnaıy ekonomıkalyq aımaǵynyń aýmaǵynda ornalasqan Indýstrııalyq park №1.
Munda jalpy quny 369 mlrd teńgeden asatyn 145 ónerkásiptik joba júzege asyrylýda. Qazirgi ýaqytta 103 kásiporyn jumys istep tur, taǵy 42 joba iske asyrylý kezeńinde.
– «Lokomotıv qurastyrý zaýyty» AQ-da 700-shi lokomotıvtiń shyǵarylýy – jekelegen kásiporyn jumysynyń eleýli nátıjesi ǵana emes, sonymen qatar Astananyń ónerkásiptik damýynyń, tehnologııalyq áleýetiniń jáne elordanyń eksporttyq múmkindikteriniń nyǵaıyp kele jatqanynyń kórsetkishi, – dedi «Astana Invest» qalalyq ınvestıtsııalardy damytý ortalyǵynyń ındýstrııalyq aımaqtardy ákimshilendirý departamentiniń dırektory Almat Álimbaı.
Arnaıy ekonomıkalyq aımaq aýmaǵynda ornalasqan kásiporyndarda 7 myńnan astam turaqty jumys orny qurylǵan. Jańa jobalar aıasynda taǵy shamamen 2,5 myń jumys ornyn ashý josparlanyp otyr.
Elordada Indýstrııalyq park №2 jobasy da júzege asyrylýda. 2029 jylǵa deıin munda jalpy quny shamamen 500 mlrd teńge bolatyn 100-den astam jobany ornalastyrý josparlanǵan. Nátıjesinde 8 myńǵa jýyq jańa jumys orny ashylady dep kútilýde.
Eske salsaq Memleket basshysynyń Nıý-Iork qalasyna resmı sapary aıasynda AQSh Saýda mınıstri Govard Latnıktiń qatysýymen amerıkalyq Wabtec kompanııasymen jalpy somasy 4,2 mıllıard dollar bolatyn kelisimge qol qoıý rásimi ótken edi.
Aıta keteıik, Qazaqstanda vagon jasaý salasynda ónerkásiptik klaster qurylatynyn jazǵan edik.
