Astanada 100-den astam adamǵa avtokredıt rásimdetken qylmystyq top ustaldy
ASTANA. KAZINFORM – Astana qalasynda qarjy pıramıdasyn quryp, alaıaqtyq jasaǵan uıymdasqan qylmystyq toptyń qatysýshylaryna qatysty aıyptaý úkimi shyǵaryldy.
Sotta qylmystyq top quramynda 10-nan astam adamnyń bolǵany jáne olardyń árqaısysynyń ózara naqty bólingen mindetteri bolǵany anyqtaldy.
Qalalyq prokýratýra málimetinshe, top músheleri azamattardy 1 mln teńgeden 2 mln teńgege deıin aqshalaı syıaqy tólenetinine sendirip, avtokredıt rásimdeýge kóndirgen. Sonymen qatar nesıe boıynsha mindettemelerdi ózderi óteıtinine ýáde etken. Alynǵan avtokólikter zańsyz satylyp, olardyń bir bóligi Qazaqstan Respýblıkasynyń aýmaǵynan tys jerlerge shyǵarylǵan.
Qylmystyq áreketterdiń saldarynan 100-den astam azamat jábirlenýshi dep tanylyp, barlyǵy 165 avtokólik rásimdelgen.
Sot úkimimen kináliler uıymdasqan qylmystyq topty qurǵany jáne oǵan basshylyq jasaǵany, qarjy pıramıdasyn qurǵany jáne oǵan basshylyq jasaǵany, sondaı-aq alaıaqtyq jasaǵany úshin kináli dep tanylyp, 5 jyldan 8 jylǵa deıingi merzimge bas bostandyǵynan aıyrý jazasyna sottaldy.
Jábirlenýshilerdiń azamattyq talap-aryzdary qanaǵattandyryldy.
Sot úkimi zańdy kúshine engen joq.
Aıta keteıik, Qarjylyq monıtorıng agenttigi shamamen 140 myń azamatty medıtsınalyq uıymdarǵa jalǵan tirkeý jáne kórsetilmegen medıtsınalyq qyzmetter týraly jalǵan málimet engizý arqyly Áleýmettik medıtsınalyq saqtandyrý qorynan zańsyz qarjy alý shemalaryn anyqtady.
