Astanada 10-nan astam kópqabatty turǵyn úı ortalyq jylý júıesine qosylmaǵan
ASTANA. KAZINFORM — Astanada 10-nan astam kóppáterli turǵyn úı áli kúnge deıin ortalyqtandyrylǵan jylýmen jabdyqtaý júıesine qosylmaǵan. Bul týraly Kazinform halyqaralyq aqparat agenttiginiń resmı saýalyna jaýap bergen Astana qalasynyń ákimdigi málim etti.
Ákimdiktiń málimetinshe, ortalyq jylý júıesine qosylmaǵan turǵyn úılerdiń qatarynda «Arabı», «Adına», «Aq Otaý», «Shuǵyla», «Kóktal», «Aspan Park Orman Park», «Qorǵaljyn» turǵyn úı keshenderi, sondaı-aq E-496 kóshesindegi 10, 10/1, 10/3 jáne Omarov kóshesi, 23/1 mekenjaılaryndaǵy turǵyn úıler bar.
— Kóppáterli turǵyn úılerdi ortalyqtandyrylǵan sýmen jabdyqtaý, jylýmen jabdyqtaý jáne káriz júıelerine qosý qurylys salýshylar tarapynan berilgen tehnıkalyq sharttarǵa sáıkes júzege asyrylady. Qajetti ınjenerlik jelilerge qosylmaǵan kóppáterli turǵyn úılerdi paıdalanýǵa berýge jol berilmeıdi, — delingen jaýapta.
Sonymen qatar Astana qalasynyń Kommýnaldyq sharýashylyq basqarmasynyń aqparatyna sáıkes, búginde elorda turǵyndary ortalyqtandyrylǵan aýyzsýmen 100 paıyz qamtamasyz etilgen. Qalanyń ınjenerlik ınfraqurylymyn damytý jáne jańǵyrtý, onyń ishinde sý, jylý jáne káriz jelilerin salý men rekonstrýktsııalaý jumystary bekitilgen bas josparǵa jáne kózdelgen bıýdjettik qarjylandyrý sheginde turaqty túrde júrgizilip keledi.
Buǵan deıin, Turǵyn úı sertıfıkaty kimderge beriledi jáne úı alýda neni eskerý kerek ekenin jazǵanbyz.
Sonymen qatar apatty turǵyn úılerdi renovatsııalaýǵa jańa kepildik tetigi engizildi.
