Astanada 10 myń adamǵa arnalǵan eń zamanaýı stýdenttik kampýstyń qurylysy bastalady - EUÝ rektory
ASTANA. QazAqparat - Astanada 10 myń adamǵa arnalǵan eń zamanaýı stýdenttik kampýstyń qurylysy bastalady. Bul týraly búgin Astanada QR Prezıdenti janyndaǵy Ortalyq kommýnıkatsııalar qyzmetiniń baspasóz máslıhatynda L.Gýmılev atyndaǵy EUÝ rektory Erlan Sydyqov málim etti.
"Stýdentterdiń bilim sapasy ǵana emes, áleýmettik jaǵdaıy da únemi baqylaýda bolýy shart. Biz sońǵy jyldary ǵana eki jataqhana saldyq. Árıne bunyń barlyǵy az", - dedi ol tilshilermen bolǵan suhbatta.
Onyń aıtýynsha, Elbasy osydan bir-eki jyl buryn aıtqan Joldaýynda Almatyda 20 myń, Astanada 10 myń adamǵa jetetin stýdentter qalashyǵyn salýdy tapsyrǵan bolatyn. Qazirgi ýaqytta ol jumys ornynan qozǵala bastaǵan.
"Eki jyldyń júzinde onyń qurylysy aıaqtalýy da yqtımal. 45 gektar jer bólingen, jobasy bári bar. Onda onyń ishinde tek jatatyn oryn ǵana emes, tipti balabaqsha, dúkender, kir jýatyn oryndar, sport jáne kıno keshenderin salý josparlanǵan. Barlyǵy bar, tek qana oqy, sabaǵyńa bar, bilimińdi al", - dep atap ótti ol.
Rektordyń sózine qaraǵanda, ýnıversıtet janynan emhana, kınoteatr syndy áleýmettik jobalar qolǵa alynǵan.
"Biz qalashyqtyń salynýyn tospaı, ózimizdiń emhanamyzdy qurdyq. Onda otadan basqasynyń barlyǵy jasalady. Kúnine júz stýdentti qabyldap otyr. Sonymen qatar ózimizdiń kınoteatrymyzdy ashqan bolatynbyz", - dep túıdi sózin E. Sydyqov.
