Astanada 10 qabatty úıde órt shyqty, balalar qutqaryldy
ASTANA. KAZINFORM – Elordada qutqarýshylar kópqabatty turǵyn úıde shyqqan órtti sóndirdi.
Tótenshe jaǵdaılar mınıstrliginiń málimetinshe, oqıǵa Nura aýdanyndaǵy Kúltegin kóshesinde ornalasqan on qabatty turǵyn úıde bolǵan.
Alǵashqy órt sóndirý bólimsheleri kelgen kezde podezde qoıý tútin baıqalǵan.
Órt elektr qalqany ornalasqan shahtada birinshi qabattan onynshy qabatqa deıin taraǵan.
- Qutqarýshylar órt sóndirý oqpandaryn jedel berip, jalyndy tolyq sóndirý úshin barlyq qajetti sharalardy qabyldady. Sýdyń úzdiksiz berilýi qamtamasyz etildi. Turǵyndardy evakýatsııalaý júrgizildi, - delingen aqparatta.
TJM kúshteri avtosatynyń kómegimen 3 adamdy qutqardy, olardyń barlyǵy balalar. Sonymen qatar baspaldaq marshtary arqyly qutqarý qalpaqshalaryn paıdalanyp taǵy 2 adam qutqaryldy, onyń biri bala.
Vedomstvonyń habarlaýynsha, zardap shekkender týraly aqparat 112 qyzmetine túspegen.
Qazirgi ýaqytta oqıǵanyń mán-jaıy anyqtalyp jatyr.
Aıta keteıik, buǵan deıin Astanada órt kezinde erejeni buzǵan júrgizýshi jaýapkershilikke tartylǵany habarlandy,