Astanada jyldamdyǵy 10 Gbıt/s kabeldik ınternet synaqtan ótkizilip jatyr

ASTANA. KAZINFORM — Astanada sekýndyna 10 Gıgabıt jyldamdyqpen jumys isteıtin kabeldik ınternet jobasy tanystyryldy. Joba synaqtan sátti ótse, aldaǵy ýaqytta elimizde qoldanysqa engizile bastaıdy.

— Búgingi tańda qala damýyn tsıfrlyq qyzmettersiz elestetý múmkin emes. Jasandy ıntellekt kólik, densaýlyq saqtaý, bilim berý, qaýipsizdik jáne halyqqa qyzmet kórsetý salasynda belsendi túrde qoldanylady. Biraq osy júıelerdiń senimdi ári jyldam jumys isteýi úshin qýatty jáne zamanaýı tsıfrlyq ınfraqurylym qajet. Ony 10 GPON tehnologııasy qamtamasyz etedi. 10 GPON ınternettiń jańa jyldamdyǵy ǵana emes, ol — tsıfrlyq qyzmetterdiń sapaly deńgeıge kóshýine múmkindik beretin negiz, — dedi Astana ákiminiń orynbasary Evgenıı Glotov.

Onyń aıtýynsha, osy tehnologııanyń arqasynda zamanaýı telemedıtsına da qarqyndy damymaq.

Belgili bolǵandaı, bul tehnologııany qoldanysqa engizý barysynda aıtarlyqtaı qosymsha shyǵyn shyqpaıdy. 

— Tehnologııa álemdegi birqatar elderde buǵan deıin qoldanysqa engizilgen, alǵash oılap tabylǵan dúnıe emes. Biraq Qazaqstanǵa alǵash kelip jatyr. Bunyń bir tıimdi tusy — qazir qoldanystaǵy jelilerdi túbegeıli jańartpaı-aq engize berýge bolatynynda. Naqty aıtqanda, ınternet taratýshy qurylǵylardy ǵana aýystyrǵan jaǵdaıda, qazirgi qoldanysta talshyqty-optıkalyq jeliler 10G jyldamdyqtaǵy ınternetti tasymaldaýǵa jaraıdy, — dedi Huawei Technologies Kazakhstan kompanııasynyń Jelilik sheshimder boıynsha tehnıkalyq dırektory Andreı Sım.

Pılottyq jobaǵa qala turǵyndary 19 qyrkúıekke deıin qatysa alady. 10G ınternetti synaý Dostyq kóshesi, 8/1 mekenjaıyndaǵy Forte kovorkınginde dúısenbiden jumaǵa deıin saǵat 9:00–den 18:00–ge deıin júzege asyrylady. Onda ár adam kelip Speedtest jasap nemese «salmaǵy aýyr» oıyndar men baǵdarlamalardy júktep, ınternettiń qanshalyqty jyldam jumys isteıtinin óz kózimen kóre alady. 

Aıta keteıik, 10G PON — bul sekýndyna 10 gıgabıt jyldamdyqpen málimet júkteı alatyn kabeldik ınternet. 4G jáne 5G uıaly baılanys standarttarynan aıyrmashylyǵy — «10» sany tehnologııanyń býynyn emes, derekterdi tasymaldaý jyldamdyǵyn bildiredi.