Astanada 10 bala terezeden qulap, ekeýi qaza tapty
ASTANA. QazAqparat - 2013 jyly Astanada kishkentaı balalar terezeden qulaǵan 10 oqıǵa tirkelgen. Bul týraly elorda ákimdiginiń resmı saıty qalalyq Tótenshe jaǵdaılar departamentine silteme jasaı otyryp, habarlaıdy.
«2013 jyly Astanada 10 bala bıiktikten qulap, ekeýi kóz jumdy. Mundaı oqys oqıǵalarǵa kóbinese páterde ata-anasynyń qaraýynsyz qalǵan 3-5 jas aralyǵyndaǵy sábıler ushyraıdy», - delingen habarlamada.
Statıstıkalyq málimetterge sáıkes, qaıǵyly jaǵdaılardyń oryn alýyna basty sebep - páterlerge ornatylyp jatqan plastık terezelerdiń moskıt torlarynyń turaqsyzdyǵy men balasyn qaraýsyz qaldyrǵan ata-analardyń nemquraılyǵy.
Osyǵan oraı, elordalyq qutqarýshylar «Qaladaǵy kópqabatty ǵımarattarda plastık terezelerdi paıdalaný kezinde qaýipsizdikti qamtamasyz etý» taqyrybynda dóńgelek ústel ótkizdi. Oǵan aýdandyq ákimdikterdiń, prokýratýranyń, ІІB, Bilim basqarmasynyń ókilderi men plastık terezelerdi ornatýmen aınalysatyn mamandar shaqyryldy. Otyrys barysynda qutqarýshylar qala turǵyndaryna kishkentaı balalary bar páterlerdiń terezelerin ashyq qaldyrmaý, terezege tıisti moskıt torlaryn ornatý kerektigin eskertip, eresekteý balalardy ózinen kishilerge qaraýǵa úıretý týraly keńester berdi. Sonymen qatar, qutqarýshy qyzmetkerler balanyń qaýipsizdigi úshin terezeniń aldyna jıhaz qoımaý, kúnnen qorǵaıtyn jalıýzılerde, rýlon perdelerde salbyraǵan baýlar bolmaýy kerektigin de aıtty.
