Astanada 1-synypqa úshem qabyldandy
ASTANA. KAZINFORM – Elordada birinshi synypqa qujat qabyldaý naýqany bastalǵannan keıin bir mektepke bir úıdiń úshem balasy qatar qabyldandy.
Astana qalasy ákimdiginiń málimetinshe, №37 mektep-lıtseıne Kúntýǵan Baqyt, Aıtýǵan Baqyt jáne Nurtýǵan Baqyt esimdi úshemder qujat tapsyrǵan.
Jańa oqý jylynda olar birinshi synypta qazaq tilinde bilim alady.
– Qulynshaqtarymyzdyń qadamdary qutty bolyp, bilim jolynda bıik belesterdi baǵyndyrsyn. Elin súıetin, tárbıeli ári bilimdi azamat bolyp ósse eken deımiz, – deıdi ata-analary.
Bir otbasynyń úsh perzentiniń mektep tabaldyryǵyn qatar attaýy ata-analar úshin de, bilim ordasy úshin de erekshe oqıǵa boldy.
Aıta keteıik, Astana qalasynda 1-synypqa qujat qabyldaý 27 mamyr men 31 tamyz aralyǵynda júrgiziledi.
