Astanada 1 myńnan astam orynǵa eseptelgen jańa 4 balabaqsha ashylady
ASTANA. Shildeniń 22-si. QazAqparat /Gúlmıra Álıakparova/ - Aldaǵy kúnderi Astanada jańa taǵy 4 balabaqsha esikterin aıqara ashady.
Elorda ákimdiginen málim etkendeı, barlyǵy 1040 orynǵa arnalǵan tórt jańa balabaqsha iske qosylady. Olar: Komsomolskıı kenti, Domalaq Ana kóshesinde ornalasqan - «Mereı»; Belıakov kóshesinen oryn tepken - «Qaraqat»; Zarechnyı kentiniń 24-shi jáne 37-shi kósheleriniń qıylysynda turǵyzylǵan - «Bereke» jáne Aq meshit pen Almaty kósheleriniń qıylysynda boı kótergen - «Nur-Aı» balabaqshalary.
Mektepke deıingi atalmysh bilim ordalaryna balalardy ornalastyrý aǵymdaǵy jylǵy tamyzdyń 4-13 aralyǵynda júrgiziledi.
Joldamalardy úlestirý boıynsha komıssııa senbi men jeksenbiden basqa kúnderi Konstıtýtsııa kóshesi, 44-te (№26-shy bastaýy mektep) jumys isteıtin bolady.
2008 jyly týylǵan balalary bar ata-analardy qabyldaý tamyzdyń 4,5 kúnderi (barlyǵy - 140 oryn), 2007 jylǵylar úshin qabyldaý - tamyzdyń 6,9 (275), 2006 jylǵylar - 10,11 (375) jáne 2005 jyly dúnıege kelgen búldirshinder úshin qabyldaý tamyzdyń 12,13 (250) kúnderi júrgiziledi.
Sondaı-aq ákimdikten habarlaǵandaı, buǵan deıin «Samuryq» balabaqshasyna jiberilgen balalar «Erketaı» balabaqshasyna qaıta ornalastyrylyp otyrǵandyqtan, atalmysh ekinshi balabaqshaǵa balalardy qabyldaý júrgizilmeıdi.
Aıta keteıik, Astanada búgingi kúni balabaqsha kezeginde 6 jasqa deıingi barlyǵy 35 myń bala tur. Mektepke deıingi bilimmen qamtylǵandardyń sany - 16 myń. Elbasynyń balabaqshalar sanyn arttyrý tapsyrmasyna sáıkes qolǵa alynǵan sharalardyń nátıjesinde barlyq óńirlerde sııaqty Astana qalasynda da mektepke deıingi nysandardyń sany artyp keledi. Máselen, elordada jyl basynda 39 memlekettik balabaqsha jumys istese, qazirgi ýaqytta olardyń sany 48-ge jetti. Sonymen birge 5 jekemenshik mekemeler ashyldy, olar - 27.
Sondaı-aq eske sala keteıik, Astana qalasy ákimdiginiń bastamasymen 2010 jylǵy sáýir aıynan bastap 1 myń balaǵa mektepke deıingi tárbıe men bilim berýge jekemenshik balabaqshalarda memlekettik tapsyrys ornalastyryla bastady. Aldaǵy qyrkúıekte balalardyń sany taǵy 1975-ke arttyrylady. Memlekettik tapsyrys alǵan balabaqshalarǵa bir bala úshin bıýdjetten aıyna 11 896 teńge aýdarylady. Qajetti qalǵan somany ata-analardyń ózderi óteýi tıis.
