Astanada 1 myńnan astam azamat kezinde Kedendik odaq elderinen jetkizilgen kólikterin tirkeı almaǵan

ASTANA. QazAqparat - QR ІІM-niń Avtomobıl ıelerine arnalǵan Arnaıy HQKO-larǵa qosymsha qujattardy usyný boıynsha negizsiz túrde talaptardy engizýi saldarynan Astanada 1 myńnan astam azamat óz kólikterin tirkeı almaǵan. Bul jaıynda búgin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń basshysy Dýlat Ázbergenov málim etti.

«Jemqorlyqqa qarsy qyzmettiń BAQ betterin monıtorıngileý men jospardan tys tekserýi kezinde Kedendik odaq elderinen ákelingen kólikterdi esepten shyǵarý men avtokólik úshin sáıkestik sertıfıkatynyń bolýy týraly qosymsha qujattardy usyný boıynsha QR ІІM Ákimshilik polıtsııa komıtetiniń basshylyǵymen negizsiz talaptar engizilgeni anyqtaldy. Osynyń nátıjesinde tek Astanada 1 myńnan astam adam óz kólikterin tirkeı almaǵan»,- dedi departament basshysy elorda ákimdiginde ótken memlekettik organdar kórsetetin qyzmetterdiń sapasy máselesine arnalǵan semınar-keńeste.

Onyń sózine qaraǵanda, qazirgi kezde atalǵan talaptan ishki organdar bas tartqan jáne kólikti tirkeý sharalary jalpy standarttar boıynsha júrgizilýde.