Astanada 1 maýsymda sýǵa túsý maýsymy bastalady
ASTANA. QazAqparat - Astanada sýǵa túsý maýsymy 1 maýsymda bastalady. Elordanyń sýda qutqarý qyzmeti óziniń júzý maýsymyna daıyn ekendigin málim etti, jeke quram 95 paıyzǵa jınaqtalǵan, avtomobılder men katerler jumysqa saıma-saı ázir, dep habarlady astana.gov.kz.
«Júzý maýsymynyń bastalýyna baılanysty sharalar kesheni ótkizilýde, Astananyń sýlarynda qaýipsizdikti qamtamasyz etý jospary jasaldy. Sondaı-aq respýblıkalyq deńgeıde vedomstvoaralyq memlekettik komıssııa otyrysy ótti. Onda azamattardyń qaýipsizdigi máselesi qaraldy», - deıdi Astana qalasy TJD bastyǵynyń orynbasary Ibragım Kúlshimbaev.
Jaz - demalys maýsymy. Ókinishtisi, apatty jaǵdaıdyń kóbi de osy mezgilde bolyp, tilsiz jaýmen kúres qyzady. Tek byltyrdyń ózinde Qazaqstan boıynsha 400 astam adam sýǵa ketken. Onyń ishinde 8-i Astanadan. Taǵy 25 elordalyq turǵyn sýdan qutqarylypty. Jalpy, zardap shegetinderdiń 70 paıyzy 30 jasqa deıingi azamattar, qalǵany balalar men jasóspirimder eken. Sondyqtan da Astananyń sýda qutqarý qyzmetiniń ókilderi sýda júzý erejelerin qatań ustanýǵa keńes beredi.
