Astanada 1 mamyrda búkil sýburqaqtar qosylady
Jaz jaqyndaǵan saıyn astanalyqtar qala kórki- sýburqaqtardyń jumysyn asyǵa kútedi. «Astana-Zelenstroı» AQ astana.kz saıtyna habarlaǵandaı sýburqaqtar 1 mamyr kúni tańerteń qosylady.
«Dástúr boıynsha sýburqaqtar 1 mamyrda tańerteń qosylady. Olar negizinen tańǵy saǵat 8.00-den túngi saǵat 00.00 deıin jumys isteıdi. Kúndizgi ýaqytta 2 ret tehnıkalyq úzilis jasalady. Ádette, saǵat 11.00-12.00 jáne saǵat 16.00-17.00», - delingen habarlamada.
Mamandar sýburqaqtardyń úzdiksiz jumysyn qamtamasyz etý úshin turaqty baqylaý jasap, profılaktıkalyq jáne jóndeý jumystaryn júrgizedi, al qysta sýburqaqtardyń bári toqtatylyp qoıylady. Sýburqaqtar toqtatylǵan kezde sý tolyǵymen soryp alynady, syrtqy jabdyqtary, qondyrmalary bólshekteledi, sý qoımalarynyń jabyndary qar men muzdan tazartylady, jerasty tehnıkalyq orynjaılarǵa jylytqysh quraldar ornatylady. Kóktem shyqqanda qar erigen soń sýburqaqtardy iske qosý boıynsha jumystar qolǵa alynady. Búkil qondyrǵylar ornatylady, jóndeý, synaý jumystary júrgiziledi.
Aıta keteıik, «Astana-Zelenstroı» AQ 36 qalalyq sýburqaq keshenine qyzmet kórsetedi. Atap aıtqanda, sýǵa hımııalyq reaktıvter qosyp, sýburqaq ydysyna sanıtarlyq-gıgıenalyq tazalaý júrgizedi, tehnologııalyq jáne elektr jabdyqtaryna tehnıkalyq qyzmet kórsetedi. Qazirgi ýaqytta elordada 120 sýburqaqtan turatyn 36 sýburqaq kesheni bar.
Astana sýburqaqtary qalanyń qaıtalanbas kórki bolyp tabylady, olardyń dızaıny ár alýan jáne zamanaýı qondyrǵylarmen jabdyqtalǵan. Qazirgi zamanǵy sýburqaqtar sýretterdiń qozǵalysy men ózgerýin, jaryqty, mýzykany retteıtin baǵdarlamalyq qamtýdyń kómegimen jumys isteıdi. Kez-kelgen sýburqaq sorǵylar arqyly sýǵa qysym bere otyryp, iske qosylady.
