Astanada 1 mamyr merekesine oraı velosherý ótedi
ASTANA. QazAqparat - Astanada 1 mamyrda Qazaqstan halqynyń birligi kúnine oraı «Dostyq sherýi» atty velosherý ótedi, dep habarlaıdy QazAqparat Astana qalalyq Mádenıet jáne sport basqarmasyna silteme jasap.
Sporttyq is-shara Astananyń 20 jyldyǵy men «Rýhanı jańǵyrý» baǵdarlamasy aıasynda júzege asyrylady.
Jarys saǵat 13:00-de «Báıterek» monýmentiniń aldyndaǵy alańnan bastalady. Qatysýshylardy tirkeý saǵat 11:00-de ótkiziledi. Marshrýttyń uzaqtyǵy - 4100 m.
Velosherýge qatysýshylar Astananyń sol jaǵalaýymen júrip ótedi. Sharaǵa álemdik deńgeıde el namysyn qorǵap júrgen tanymal veloshabandozdar, belgili sportshylar, etnomádenı birlestikterdiń ókilderi, sondaı-aq 12 jastan asqan elorda turǵyndary men qonaqtary qatysady.
Munymen qosa, velosherýge «Astana» Prezıdenttik klýbynyń «Astana Pro Team» kásipqoı komandasynyń ókili Dmıtrıı Grýzdev te shaqyryldy. Sportshy Qazaqstannyń úsh dúrkin chempıony, jeke jarysta Azııanyń eki dúrkin chempıony atanǵan.
Aıta keteıik, alańda velosıpedterdi jalǵa berý uıymdastyrylady, quny - 500-1000 teńge.
Jarys aldynda kontserttik baǵdarlama ótedi, qatysýshylarǵa jaqsy kóńil-kúı syılaıtyn jalpy sporttyq jattyǵýlar jasalady. Velosherý aıaqtalǵan soń tirkelgen qatysýshylar arasynda velosıpedter men basqa da baǵaly syılyqtar oınatylady.
Qala turǵyndaryn belsendi jáne salamatty ómir saltyna baýlý, sondaı-aq kúndelikti ómirde velosıpedpen júrýdi dáripteý maqsatynda sporttyq buqaralyq sharany Astana qalasynyń mádenıet jáne sport basqarmasy uıymdastyryp otyr.
