Astanada 1 qyrkúıekte jaratylystaný-matematıkalyq beıindegi mektep ashylady
ASTANA. 23 tamyz. QazAqparat - Astanada jańa oqý jylynda jaratylystaný-matematıkalyq beıindegi mektep esigin aıqara ashady. Bul týraly astana.kz saıtyna Bilim basqarmasynan habarlady.
№71 mektep-lıtseı jobalanyp jatqan «Batyǵaı» turǵyn úı kesheniniń aýmaǵynda, «Jaǵalaý» shaǵyn aýdanynda ornalasqan. Ǵımarattyń jalpy aýdany - 12 700 sharshy metr, 4 ga. aýmaqty alyp jatyr.
«Oqý ornynyń aýmaǵynda balalarǵa arnalǵan oıyn alańy, fýtbol, basketbol jáne voleıbol alańdary, sondaı-aq, bıologııadan tájirıbelik sabaqtar ótkizetin alań bar. Budan basqa, mektepte hımııa, bıologııa, fızıka pánderinen 2 zerthana jáne 4 lıngafon kabıneti, 2 mýltımedııalyq kabınet, sport zaly, trenajer jáne akt zaldary, kitaphana bolady», - dep habarlady astana.kz saıtyna vedomstvodan.
Oqýshylar arasynda básekege qabilettilikti damytý úshin mektepke deıingi daıyndyq toptary qurylyp, logıka, shahmat, toǵyzqumalaqtan qosymsha sabaqtar ótkiziledi. Sonymen qatar, vokal, dombyra, sýret salý jáne bı úıirmeleri ashylady. 1-synyptan bastap aǵylshyn tili, 5-synypta qyzyqty matematıka, 7-synypta tehnıkalyq fızıka, bıologııa men hımııadan qosymsha sabaqtar engiziledi. Mektep-lıtseıde qazaqsha kúres, dzıýdo, voleıbol, basketbol, fýtbol syndy sport túrlerinen sektsııalar uıymdastyrylady. Sondaı-aq, Astanada mektep hokkeı lıgasyn qurýǵa bastamashy bolatyn jasóspirimderdiń hokkeı klýby qurylady. Oqýshy jastardy patrıottyq tárbıeleýge arnalǵan memlekettik baǵdarlamany tıimdi júzege asyrý jáne olardy Qarýly kúshterdiń qatarynda qyzmet etýge daıyndaý maqsatynda 2013-2014 jj oqý jylynan bastap áskerı-patrıottyq klýb jáne kadetter synyby ashylady.
