Astanada 1 aı «Halyq senimi - polıtsııa kúshi» atty aktsııa ótedi
ASTANA. QazAqparat - Astana qalasynda 1 naýryz ben 1 sáýir aralyǵynda «Halyq senimi - polıtsııa kúshi» atty aktsııa ótkiziledi. Bul týraly búgin Astana qalalyq ІІD-de ótken brıfıngte ІІD ÁPB basshysynyń orynbasary Gosman Jakın aıtty.
Onyń aıtýynsha, sharanyń maqsaty halyq arasynda ýchaskelik polıtsııa ınspektorlarynyń bedelin arttyrý, quqyq buzýshylyqtardyń aldyn alý, eskertý jáne qylmystar men ákimshilik quqyq buzýshylyqtardy der kezinde aýyzdyqtaý. «Aktsııa barysynda ýchaskelik polıtsııa ınspektorlary otbasylyq-turmystyq qarym-qatynas, jeke múlikti saqtaý sheńberindegi quqyq buzýshylyqtardyń aldyn alý máselelerinde quqyqtyq kómek kórsetý maqsatynda halyqpen basqóosý jıyndaryn ótkizetin bolady. Ýchaskelik polıtsııa ınspektorlary turǵyndar arasynda ákimshilik ýchaskege qyzmet kórsetetin ýchaskelik polıtsııa ınspektory týraly tolyq aqparatty, polıtsııa bólimshesiniń telefon nómiri men mekenjaıy bar esimhattardy (vızıtka) taratyp, árbir páterdi aralaý barysynda qandaı da bir quqyqbuzýshylyqqa baılanysty jaýapkershilikke tartý sharalary týraly aqparattar jazylǵan býkletterdi úlestiredi», - dep atap ótti G. Jakın. Sonymen qatar, onyń málimetinshe, respýblıka aýmaǵynda 2-6 naýryz aralyǵynda turmystyq qarym-qatynas kezinde, mas adamdardyń qatysýymen jasalatyn quqyq buzýshylyqtar men qylmystardyń aldyn alýǵa baǵyttalǵan «Turmys» jedel aldyn alý is-sharalary júrgiziledi. «Іshki ister organdarynyń jumys tıimdiligi kóbinese halyqtyń belsendiligine, sondaı-aq olardyń qylmyspen birlesip kúresý máselesin durys túsinýine baılanysty. Qylmyspen kúresý jáne quqyq buzýshylyqtarǵa qarsy áreket etý jaǵdaılary tek polıtsııanyń kúshimen ǵana júz paıyz ońtaıly bolýy múmkin emes. Oǵan árbir azamat ózindik úlesin qossa ǵana nátıje shyǵady», - dep atap ótti G. Jakın.
