Astanada 1 aı boıy taksı qyzmetteri tekseriledi
ASTANA. QazAqparat - Astanada kólik júrgizýshileriniń zańsyz qyzmet kórsetýiniń aldyn alýǵa baǵyttalǵan shara ótedi. Bul týraly búgin Astana qalalyq jolaýshylar tasymaly basqarmasynyń basshysy Bekmyrza Igenberdınov málim etti, dep habarlaıdy QazAqparat.
«Ózderińizde biletindeı, 12 sáýirde taksı kólikteriniń jańa eskızi men júrgizýshilerdiń kıim úlgileri bekitilgen bolatyn. Búgingi kúni bizdiń tizilimde 14 taksomotor kompanııasy bar. Olarda shamamen 500 kólik tirkelgen. Aıta keterligi, «Avtomobıl kóligi týraly» Zańǵa sáıkes jeke kásipkerler nemese zańdy tulǵalar jolaýshylar tasymaldaýshy retinde qyzmet kórsetýin bastamas buryn jergilikti atqarýshy organǵa QR «Ruqsat jáne habarlama týraly» zańymen belgilengen tártippen qyzmetiniń bastalǵandyǵy týraly habarlama jiberýge mindetti. Osydan keıin jolaýshylar men júkterdi kóliktermen tasymaldaý týraly erejeniń 96 jáne 97 tarmaqtaryna sáıkes jeke kásipker nemese zańdy tulǵa Astana qalalyq Jolaýshylar kóligimen basqarmasymen árbir kólikke shart jasasyp, kólik quralyna kýálik alýy qajet», - dedi ol.
Onyń aıtýynsha, zańsyz jolaýshylar tasymalmen aınalysatyn taksı qyzmeteriniń kólikteri tehnıkalyq turǵyda qanaǵattanarlyqsyz bolyp keledi jáne olardyń basym bóligi 90-shy jyldary shyǵarylǵan. Sonymen qatar olar jolaýshylardy tasymaldaýǵa shyǵar aldynda medıtsınalyq tekserýden ótpeıdi, kóliktiń tehnıkalyq jaǵdaıy syn kótermeıdi.
«Atalǵan barlyq táýekelder jolaýshylarǵa júkteledi. Buǵan qosa, saqtandyrý polısteri men tasymaldaýshynyń jolaýshylar aldyndaǵy azamattyq-quqyqtyq jaýapkershiligin mindetteıtin saqtandyrý sharty, sonymen qatar ruqsat beretin qujattary men kelisimderi bolmaıdy. Mundaı jaıt jolaýshlylardyń ómiri men densaýlyǵyna qaýip tóndiredi»,- dedi Igenberdınov.
Basqarma basshysynyń aıtýynsha, osyǵan baılanysty 12 qyrkúıekten bastap bir aı boıy avtokólik quraldary júrgizýshileriniń zańsyz qyzmet kórsetýiniń aldyn alýǵa baǵyttalǵan jedel sharalar ótkiziletin bolady.
«Aılyqtyń qorytyndysy boıynsha saraptama jasaımyz. Jalpy bul sharaǵa Ákimshilik polıtsııa, Jergilikti polıtsııa qyzmeti, Kóliktik baqylaý ınspektsııasy, Astana qalalyq memlekettik kirister departamenti jáne basqa da múddeli organdar jumyldyrylady», - dedi ol.
