Astanada 1,5 myńnan astam stýdentke arnalǵan álemdik deńgeıdegi kolledj ashylady

Saıttyń jazýynsha, Memleket basshysynyń tapsyrmasymen Astana men Almatyda álemdik deńgeıdegi 2 kolledjdiń, sonymen qatar Atyraý, Óskemen, Ekibastuz ben Shymkent qalalarynda 4 óńiraralyq ortalyqtyń qurylysy qolǵa alynbaq. Elordada oqý ornynyń qurylysy 2014 jyly bastalyp, eki kezeńmen júrgiziledi. Birinshi nysan 2015 jyly qyrkúıekte jáne ekinshisi 2017 jyly maýsym aıynda tapsyrylady. Astanadaǵy ǵımarattyń aýmaǵy 16,5 ga quraıdy. Álemdik deńgeıdegi kolledjde 6 kásibı mektep jumys isteıdi. Atap aıtqanda, «Týrızm men meımanhana isi», «Qurylys jáne turǵyn úı kommýnaldyq sharýashylyq», «Energetıka», «Injenerııa», «Dızaın», «Aqparattyq kommýnıkatsııalyq tehnologııalar». Atalǵan baǵyttar respýblıkamyzdyń salalaryn damytýdyń boljaldy josparyna sáıkes jáne eń qajetti mamandyqtardy anyqtaý maqsatynda 200-den astam kásiporynnyń arasynda júrgizilgen taldaýdyń negizinde tańdap alyndy. Kolledjde tehnıkalyq salada negizgi til bolyp sanalatyn aǵylshyn tilinde 3 jyl boıy bazalyq tehnıkalyq mamandyqtar boıynsha 1530 stýdent bilim alatyn bolady. Sonymen qatar, qajetti mamandyqtar boıynsha biliktilikti arttyrý kýrstary uıymdastyrylady. «Barsha Qazaqstan jastarynyń kolledjde oqýyn qamtamasyz etýge basymdyq berilip otyrǵandyqtan aýyl jastaryna, turmysy tómen otbasylarǵa jáne balalar úıleriniń tárbıelenýshilerine 60% kvota qarastyrylǵan», - dep habarlady baspasóz qyzmetinen. Budan basqa, jataqhana qurylysyna 40 myń sharshy metr jer bólinedi. Bul respýblıkamyzdyń shalǵaı jatqan aımaqtarynyń stýdentterin oqytýǵa, shákirtaqy tóleýge jáne turǵynjaımen qamtýǵa múmkindik beredi. Stýdentterdiń praktıkalyq mashyqtaryn damytýǵa da erekshe kóńil bólinip otyr. Osyǵan oraı, 11,3 myń sharshy metr, ıaǵnı kolledjdiń jalpy aýmaǵynyń 70%-na sheberhanalar salynady. Olar qazirgi zamanǵy qondyrǵylarmen jabdyqtalmaq. Atalǵan kolledjdi támamdaǵan stýdentterge qazaqstandyq jáne sheteldik úlgidegi dıplomdar beriledi. Bul otandyq kolledjderdiń stýdentterin sheteldik mamandarmen básekege qabiletti etedi. Aıta keteıik, «Kásipqor» holdıngi» KAQ QR Prezıdentiniń tapsyrmasymen álemdik deńgeıdegi kolledjder jelisin qurý úshin qurylǵan. Holdıngtiń maqsaty kóp fýnktsıonaldy joǵary bilikti jumys kadrlaryn daıarlaýdyń jańa júıesin qalyptastyrý úshin tehnıkalyq jáne kásibı bilimdi keń aýqymdy jańǵyrtý bolyp tabylady.