Astanada 1,5 myń polıtseı men áskerı qyzmetshi Jańa jyl kúnderi tártip qadaǵalaıdy
ASTANA. QazAqparat - Jańajyldyq mereke kúnderi Astanada qoǵamdyq tártipti qadaǵalaýǵa 1500 polıtsııa jáne áskerı qyzmetker jumyldyrylady, dep habarlaıdy QazAqparat qala ákimdigine silteme jasap.
«Jańa jyl merekesi atap ótiletin - 31 jeltoqsan men 4 qańtar kúnderi aralyǵynda jáne qańtardyń 7-si men 8-i kúnderi Astana Іshki ister departamentiniń jeke quramy kúsheıtilgen qyzmet kestesine kóshiriledi. QR ІІM polıtsııa qyzmetkeri men Ulttyq ulannyń jaýyngerleri jalpy sany 1500 adam qoǵamdyq tártipti qorǵaýǵa jumyldyrylady. Sondaı-aq, mereke kúnderi avtopatrýlder kóptep tartylatyn bolady», - delingen taratylǵan habarlamada.
ІІD habarlaýynsha, qazirgi ýaqytta qoǵamdyq oryndarda azamattardyń qaýipsizdigin qamtamasyz etý úshin tolyq sharalar kesheni júrgizilýde. Oqıǵa ornyna der kezinde jetý úshin qosymsha jedel-tergeý toptary quryldy. Qaıǵyly oqıǵalardyń aldyn alý úshin sertıfıkattalmaǵan pırotehnıkalyq ónimderdi satýdyń jolyn kesý boıynsha jumys júrgizilýde. Tyıym salynǵan zattardy ákelýge jol bermeý úshin baqylaý kúsheıtildi.
