Astanada 1 400-den astam jumys orny usynylǵan bos oryndar jármeńkesi ótti

ASTANA. KAZINFORM - Astanada Ál-Farabı atyndaǵy Oqýshylar saraıynda kezekti bos oryndar jármeńkesi ótti. Jumys berýshiler 1 400-den astam bos jumys ornyn usyndy, dep habarlaıdy Astana qalasy ákimdiginiń resmı saıty.

Jármeńkeni elordadaǵy Almaty aýdanynyń ákimdigi uıymdastyrdy. 129 jumys berýshi 1 400-den astam bos jumys ornyn usyndy.

Olardyń qatarynda salalyq uıymdar, óndiristik kásiporyndar, qyzmet kórsetý salasyndaǵy kompanııalar, bilim berý mekemeleri bar. Kompanııalar óz usynystaryn tikeleı tanystyryp, jumys izdeýshiler kadr bólimderiniń ókilderimen tildesip, túıindemelerin qaldyrý múmkindigine ıe boldy.

«Alǵashqy 40 mınýt ishinde jármeńkege 400-den astam adam keldi. Munda shaǵyn jáne orta bıznes ókilderi, kommýnaldyq kásiporyndar, jeke kásiporyndar, memlekettik qurylymdar, áleýmettik sala – aýrýhanalar, emhanalar, áleýmettik mekemeler qatysýda. Máselen, Polıtsııa departamenti 30-dan astam bos jumys ornyna ótinim berdi, negizinen quqyq qorǵaý salasynyń qyzmetkerleri, polıtseıler qajet. Indýstrııalyq park kásiporyndary jumysshy mamandardy izdese, kommýnaldyq sharýashylyq jumys berýshileri – júrgizýshiden bastap basqarýshy laýazymdarǵa deıingi qyzmetkerlerdi qajet etedi. Bul – jyl basynan beri aýdanda ótken ekinshi jármeńke. Birinshisi aqpan aıynda ótti, onda 90-nan astam uıym qatysyp, 2 myńnan astam bos jumys orny usynyldy. Sol kezde jumys izdeýshiler sany myńǵa jýyqtady. Biz bul baǵytta Jumyspen qamtý jáne halyqty áleýmettik qorǵaý basqarmasyna qarasty Eńbek mobıldiligi ortalyǵymen birlese jumys isteımiz, jármeńke qorytyndysy boıynsha eńbekke ornalasý esebi júrgiziledi», – dedi Almaty aýdany ákiminiń orynbasary Araılym Elimsarına.

Qalany kógaldandyrý boıynsha jumys oryndaryna «Zelenstroı» AQ 30-ǵa jýyq bos oryn usyndy, dúkender men sýpermarketter – satýshy jáne kassır mamandyqtaryna 120 oryn, memlekettik bilim berý mekemeleri – pedagog, tárbıeshi jáne bala kútýshi qyzmetterine 13 bos oryn, densaýlyq saqtaý mekemeleri – medbıke laýazymyna 10, sanıtar qyzmetine 20 bos jumys ornyn usyndy.

Sondaı-aq kelýshilerge «Joltap» jobasynyń, qalalyq Jumyspen qamtý jáne halyqty áleýmettik qorǵaý basqarmasynyń, memlekettik qoldaý sharalary týraly aıtqan qarjy uıymdarynyń ókilderi keńes berdi.

Aıta keteıik, bıylǵy mamyr aıynda elektrondyq eńbek bırjasynda 86 myń bos jumys orny usynyldy.