Astanada 1 000-nan astam bala túzetý ortalyqtarynda kezekte tur

ASTANA. KAZINFORM — Elordada psıhologııalyq-pedagogıkalyq qoldaý qyzmetteriniń qoljetimdiligin arttyrý máselesi ózekti bolyp otyr. Bul týraly Astana qalasy Bilim basqarmasynyń basshysy Qasymhan Senǵazyev qalalyq máslıhat otyrysynda málim etti. 

— Qazirgi ýaqytta túzetý kabınetteri, ońaltý ortalyqtary jáne aýtızm ortalyǵynda 1 000-nan astam bala kezekte tur. Onyń ishinde 560-y aýtızm spektri buzylysy bar balalar. Bul kezekti azaıtý úshin psıhologııalyq-pedagogıkalyq qyzmetterge memlekettik tapsyrys bólý máselesin qarastyrý qajet dep sanaımyz, — dedi basqarma basshysy.

Qasymhan Senǵazyevtiń aıtýynsha, aldaǵy jyldary ınklıýzıvti bilim berý ınfraqurylymyn keńeıtý kózdelip otyr.

— Kelesi jyldary eki túzetý kabınetin jáne bir aýtızm ortalyǵyn ashý josparlanyp otyr. 2026 jyly bir túzetý kabıneti men aýtızm ortalyǵy, al 2027 jyly taǵy bir túzetý kabınetin ashý josparymyzda bar, — dedi ol.

Sonymen qatar basqarma basshysy kadr tapshylyǵy máselesine de toqtaldy.

— Arnaıy bilim berý uıymdarynda defektolog, logoped, olıgofrenopedagog sııaqty mamandarǵa suranys joǵary. Bul máseleni sheshý maqsatynda Abaı atyndaǵy ýnıversıtettiń fılıalynda arnaıy pedagogıkalyq fakýltet ashyldy. Qazirgi tańda onda 90 stýdent bilim alyp jatyr, onyń ishinde 40 stýdent Astana qalasy ákimdiginiń granty esebinen oqyp jatyr. Olar oqýyn támamdaǵan soń elordanyń bilim berý uıymdarynda keminde úsh jyl eńbek etýge mindetti, — dep atap ótti Qasymhan Senǵazyev.

Buǵan deıin Qazaqstanda aýtızm dıagnozy qoıylǵan 12 myńnan astam bala bar ekenin jazǵanbyz.