Astanada 01market lombard jelisi zańsyz nesıe berip, 102 mln teńgeden astam tabys tapqan

ASTANA. KAZINFORM – Qarjylyq monıtorıng agenttiginiń Astana qalasy boıynsha departamenti «01market» lombardtar jelisin uıymdastyrýshyǵa qatysty mıkrokarjylyq qyzmetpen zańsyz aınalysý deregi boıynsha tergeýdi aıaqtady.

lombard
Foto: Memlekettik kirister komıteti

Tergeý málimetinshe, 2021 jyldan beri kúdiktiniń baqylaýyndaǵy «INVEST PRO KZ» JShS, «Ismagýlov R.B.» jáne «Pro Kz» jeke kásipkerlikteri komıssııalyq saýdany búrkemelep, tıisti lıtsenzııasyz múlikti kepilge alyp, qaryz berip kelgen.

Qyzmetiniń shynaıy sıpatyn jasyrý úshin klıentterge komıssııalyq saýda mámilesi jasalǵandaı etip kepil bıletteri rásimdelgen.

Qaryz qolma-qol aqshamen berilip, onyń paıyzy, merzimin uzartqany úshin alynatyn tólemder men aıyppuldar atalǵan kásipkerlik sýbektileriniń shottaryna túsip otyrǵan.

– Qaryz 30 kúnge berilip, oǵan kúnine 0,25%-ǵa deıin syıaqy eseptelgen. Qaryzdy ýaqytynda qaıtarmaǵandarǵa qosymsha aıyppul salynyp, ol tólenbegen jaǵdaıda kepilge qoıylǵan múlik satylǵan. Zańsyz qyzmetten túsken tabys 102 mıllıon teńgeden asqan, – delingen agenttik aqparatynda.

Múlikti tárkileýdi qamtamasyz etý maqsatynda sottyń sanktsııasymen eki páterge, úsh avtokólikke jáne eki keńsege tyıym salyndy.

Qazirgi ýaqytta qylmystyq is sotqa joldandy.

QR Qylmystyq-protsestik kodeksiniń 201-babyna sáıkes ózge málimetter jarııa etilmeıdi.

Aıta keteıik, buǵan deıin Almaty oblysynda «Albı» lombardtar jelisiniń zańsyz qyzmeti toqtatylǵan bolatyn. Tergeý málimetinshe, atalǵan jeli lıtsenzııasyz qaryz berý arqyly 146 mln teńgeden astam tabys tapqan. Kúdiktiniń 21 páterine, 7 avtokóligine jáne ózge de múlkine tyıym salyndy.