«Astanabasjospar» Ýrbanıstıka ınstıtýtyna reformalanady
ASTANA. QazAqparat - Elordamyzdy damytý boıynsha bıliktiń negizgi josparlary jóninde Astana ákimi Áset Isekeshev «Qalanyń DNK-sy: Qaýymdastyq. Bıznes. Bılik» atty ýrban-forýmda egjeı-tegjeıli áńgimeledi. Qala basshysy alǵa qoıǵan mindetter men maqsattarǵa jetý úshin elordany basqarý júıesin úlken ózgerister kútip turǵanyn atap aıtty.
Ákimniń aıtýynsha, bas qalanyń basqarý júıesin jetildirý kezeń-kezeńmen júzege asyrylady. Negizinen alǵanda, úsh basty baǵyt anyqtalǵan.
«Birinshi baǵyt - josparlaýdyń jańa júıesin qurý. Qazir biz qalanyń halyqaralyq sheberlik-josparyn daıyndap jatyrmyz. Búgingi kúnge deıin postkeńestik keńistikte negizinen bas josparlar ǵana jasaldy. Alaıda, sheberlik-jospary odan áldeqaıda tıimdirek. Bul - qalanyń damý josparyn keshendi jáne kórneki kórsetetin strategııalyq keńistiktik josparlaý qujaty. Bul rette atalǵan qujat qalalyq qaýymdastyq pen halyqtyń belsendi qatysýymen daıyndalady. Sondaı-aq, sý resýrstary, energetıka, qoǵamdyq kólikti damytý boıynsha da sheberlik-josparlary jasalady. Aıtpaqshy, biz bul jumysqa kirisip kettik»,- dedi Áset Isekeshev Astana Art Fest festıvaliniń aıasynda ótken «Qalanyń DNK-sy: Qaýymdastyq. Bıznes. Bılik» atty ýrban-forýmda sóılegen sózinde.
Áset Órentaıuylynyń pikirinshe, mundaı josparlardyń bıznes úshin mańyzy zor. Óıtkeni, kásipkerler qalanyń naqty damý josparyn kóredi. Bul elordamyzda memlekettik-jekemenshik áriptestikti belsendi damytýǵa, jekemenshik ınvestıtsııalardy kóbirek tartýǵa múmkindik týǵyzady.
Qala basshysy jańa qujattardy daıyndaýmen qatar, ınstıtýtsıonaldyq reformalardyń da júrgiziletinin habarlady.
«Bizge qazir qaladaǵy damý men josparlaý ınstıtýttaryn jetildirý qajet. Osy maqsatta qalalyq qyzmetter - qala ákimdigi, aýdan ákimdikteri, basqarmalardyń jumysynyń tıimdiligin arttyratyn ózgeristerdi qolǵa aldyq. Ótken jyly «Astanabasjospar» ǵylymı ınstıtýtynyń quramynda Ýrbanıstıka ortalyǵy quryldy. Jalpy alǵanda, «Astanabasjopardyń» ózi Ýrbanıstıka ınstıtýty bolyp reformalanady. Osy ortalyq barlyq jańashyldyqtar men syn-qaterlerdi eskere otyryp, qalany damytý boıynsha sheshimder qabyldaıdy»,- dedi Áset Isekeshev.
Sonymen qatar, qala basshylyǵy Investıtsııalar jáne damý mınıstrligimen birlese otyryp, Qalalyq tehnologııalar quzyreti ortalyǵyn ashady. Bul ortalyqtyń maqsaty - qaladaǵy qurylys klasterin damytýǵa jańa tehnologııalar negizinde barlyq oıynshylardy jumyldyrý. Bul - qurylystaǵy tolyq tsıkldi tsıfrlandyrý, qurylys salasyna jańa jasyl tehnologııalardy engizý, energııa únemdeıtin jańa qurylys materıaldaryn shyǵarý jáne zerthanalar ashý baǵytyndaǵy jumystar,- dep túsindirdi Astana ákimi.
«Astana» halyqaralyq ǵylymı kesheniniń básekege qabilettilik ortalyǵynyń jetekshisi Ánýar Boranbaev ýrban-forýmda megapolısterdiń tabysqa jetýine qatysty oı-pikirlerin ortaǵa saldy.
Onyń paıymdaýynsha, eki basty qajettilikti qanaǵattandyratyn qalany qarapaıym halyqtyń qalasy dep ataýǵa bolady.
«Qala óziniń qyzmetin óńirge satady, óziniń joǵary sapaly qyzmetin álemge satady, óz turǵyndary men týrısterge satady. Qala degenimiz - bul ómir súrý sapasy jaqsarǵan jer. Sol jerde laıyqty ómir súrý úshin árkimge tabys tabatyn múmkindik bolýy shart. Eger de osy eki qajettilik qanaǵattandyrylatyn bolsa, ol adamdardyń qalasy degen sóz. Kez-kelgen qala eń áýeli óz turǵyndaryna jaıly jáne yńǵaıly bolsa, ol onda sheteldik týrıster úshin de asa tartymdy qalaǵa aınalady»,-dedi Ánýar Boranbaev.
