Astana jylytý maýsymyna daıyn

ASTANA. QazAqparat - Astananyń energetıkalyq kesheni 2014-2015 jj. jylytý maýsymyna tolyq daıyn. Búgingi tańda áleýmettik nysandar men kóppáterli turǵyn úı qoryna jylý berildi.

Astana qalasy ákimi apparatynyń baspasóz qyzmeti habarlaǵandaı, jańa jylytý maýsymyna daıyndyq sharalary aıasynda JEO-1, JEO-2 nysandary, jylý jáne elektr jelileri, sýmen qamtý jáne sý burý jelilerinde bekitilgen keste boıynsha tıisti jumystar júrgizildi.

Qalanyń energııamen qamtý nysandary otyn qorynyń tıisti normalaryna sáıkes (690 641 tonna kómir men 10 623 tonna mazýt) otyn materıaldarymen tolyq kólemde qamtamasyz etildi. Turǵyn úılerdi, bilim jáne densaýlyq saqtaý nysandaryn avtonomdy jylýmen qamtý qazandyqtary 100% iske qosyldy.

Jylý energııasymen jabdyqtaýdyń ortasha tarıfi - 2308,3 teńge/Gkal (QQS-syz), sonyń ishinde tutynýshylar toptary boıynsha: turǵyndar úshin - 2094,23 teńge/Gkal (QQS-syz); basqa tutynýshylar úshin 2582,40 teńge/Gkal (QQS-syz).

Eske sala keteıik, ótken jylǵy jylytý maýsymynda jylý energııasynyń eń tómen baǵasy 2013 jylǵy qazan aıynda 43,85 teńge/m2, al eń joǵary baǵasy 2014 jyly qańtarda 129,18 teńge/m2, (ortasha baǵasy 84,18 teńge/m2) quraǵan bolatyn. Tarıf aýa temperatýrasyna baılanysty ózgerip otyrady.

Aıta ketý kerek, Astanada jyl saıyn qysta orta eseppen 30 myń vagon kómir men 280 tsısterna mazýt jaǵylady. Kómirdiń eń kóp shyǵyny qysta táýligine 12 476 tonnany quraıdy.