Astana jylytý maýsymyna daıyn - ákimdik
ASTANA. QazAqparat - Astana ákimi Áset Isekeshev qalalyq kommýnaldyq kásiporyndar basshylarynyń, aýdan ákimderiniń, bilim, densaýlyq saqtaý, mádenıet jáne sport basqarmalarynyń aldaǵy jylytý maýsymyna daıyndyq máseleleri boıynsha esepterin tyńdady, dep habarlaıdy qalalyq ákimdiktiń baspasóz qyzmeti.
«Teplotranzıt» AQ málimetinshe, qalalyq densaýlyq saqtaý, bilim jáne mádenıet nysandary 100%, turǵyn úı qory 97%-ǵa daıyn.
«Almaty» aýdanyndaǵy 1070 úıdiń 1050-i nemese jalpy sanynyń 98% daıyn. «Esil» aýdanyndaǵy 258 úıdiń 239-ynda (93%) daıyndyq jumystary aıaqtaldy, «Saryarqa» aýdanynda 927 úıdiń 914-i (99%) qysqa daıyn.
Elordanyń úsh aýdanyndaǵy qalǵan úılerde turǵyndardyń yqylassyzdyǵynan, sondaı-aq, maqsatty qarjyny jınaý qarqynynyń tómendiginen jumystar kesteden keshiktirilip jatyr. «Astana Teplotranzıt» AQ jáne «Astana qalasynyń turǵyn úı ınspektsııasy basqarmasy» MM birlesip osy nysandar boıynsha jınalystar ótkizip, turǵyndarǵa jylý toraptaryn jóndeýge maqsatty qarjy jınaý qajettiligi týraly túsindirýde.
Elordanyń tirshilikti qamtamasyz etý nysandarynyń negizgi jáne qosalqy jabdyqtaryn jóndeý bekitilgen kestege saı júrgizilip jatyr. Búgingi tańda «Astana - Energııa» AQ - 95%, «Astana - Teplotranzıt» AQ - 92%, «Astana - REK» AQ - 80,8%, aýdandyq qazandyqtar - 100% daıyn.
Aıta keteıik, jylytý maýsymyna deıin energııa qýaty kózderinde otynnyń 20 táýliktik normatıvtik qory jasalady.
Sonymen qatar, bıylǵy jyldyń ár aıǵa bólingen kómir jetkizý kestesi bekitildi.
Kásiporyndardyń 2016-2017 jj. jylytý maýsymyna daıyndyq tólqujattary jóndeý kampanııasy aıaqtalǵan soń ú.j. 1 qazanyna deıin beriledi.
Otyrys qorytyndysy boıynsha Áset Isekeshev jaýapty tulǵalarǵa barlyq qalalyq nysandardy jylytý maýsymyna daıyndaýdy ýaqytyly aıaqtaýdy jáne 1 qazanda balabaqshalarǵa, mektepterge, aýrýhanalarǵa jylý berýdi tapsyrdy. Qalǵan nysandardy, sonyń ishinde turǵyn úılerdi jylýmen jabdyqtaý aýa raıynyń ózgerýine (aýa temperatýrasynyń tómendeýi) baılanysty bolady.
