Astana jyldyń eń úzdik medıtsınalyq uıymyn anyqtady
ASTANA. 13 jeltoqsan. QazAqparat /Jasulan Amanbaıuly/ - Astanada jyldyń eń úzdik medıtsınalyq uıymy anyqtaldy.
Búgin olar Prezıdenttik mádenıet ortalyǵynyń kontserttik zalynda «Salamatty Qazaqstan - Táýelsiz Qazaqstan» atty merekelik is-sharada marapattaldy.
Qalalyq deńgeıde bolǵan baıqaýǵa elordadaǵy «Salamatty ómir saltyn qalyptastyrý ortalyǵy» uıytqy boldy. «Eń úzdik medıtsınalyq uıym» atalymyna 8 mekeme talasqa tústi. Nátıjesinde №4 qalalyq emhana birinshi oryndy ıelendi. Ekinshi oryndy №5 qalalyq emhana aldy. Al úzdik úshtik qataryn №8 qalalyq emhana támamdady.
«Baıqaý barysynda emhanalardaǵy halyqtyń salamatty ómir saltyn saqtaýǵa baǵyttalǵan qyzmeti saralandy. Máselen, medıtsınalyq uıymdardyń temeki shegýge qarsy kúres jumystary, qart adamdarǵa nemese jastarǵa arnalǵan saýyqtyrý ortalyqtarynyń bolýy negizgi ólshem retinde qaraldy», - deıdi densaýlyq saqtaý basqarmasynyń bastyǵy Dáýlethan Esimov.
D. Esimovtiń aıtýynsha, atalǵan baıqaý jyl saıyn ótetin elordanyń dástúrli sharasyna aınalmaq.
